საქართველოს კულტურისა და ძეგლთა დაცვის სამინისტროს ინიციატივით, სამინისტროს დარბაზში, ხვალ, ისტორიულ უბნებში მიმდინარე მშენებლობებთან დაკავშირებით მრგვალი მაგიდა გაიმართება.

სამინისტროს პრესსამსახურის ინფორმაციით, შეხვედრას დაესწრებიან საქართველოს კულტურისა და ძეგლთა დაცვის მინისტრი გურამ ოდიშარია, მინისტრის პირველი მოადგილე ალექსანდე მარგიშვილი, მინისტრის მოადგილე მარინე მიზანდარი, ასევე მოწვეული სტუმრები - არქიტექტორ-ურბანისტები, ამ სფეროში მომუშავე ხელოვნების ისტორიკოსები, ICOMOS საქართველო, „თბილისის ჰამქარი“, იურისტები, არქიტექტურის მკვლევარები, თბილისის მერიის თანამშრომლები და საქართველოს კულტურული მემკვიდრეობის დაცვის ეროვნული სააგენტოს წარმომადგენლები.
შეხვედრა მიზნად ისახავს ერთი მხრივ, ისტორიული თბილისის მიმდინარე განაშენიანების, რესტავრაცია-რეაბილიტაციის საკითხებსა და ზოგადად, თბილისის ურბანული განვითარების ტენდეციების განხილვას. დისკუსია შეეხება ასევე თელავსა და მცხეთაში მიმდინარე სამუშაო პროცესებს.
სამინისტროს ინფორმაციით, შეკრება მიზნად ისახავს საზოგადოებასთან შეთანხმებით შემუშავდეს საერთო პოზიცია კულტურული მემკვიდრეობის შენარჩუნებისა და ურბანული განვითარების მხრივ, პროცესი გახდეს საჯარო განხილვის საგანი და რაც მთავარია, საფრთხის თავიდან აცილებისა და სწორი განვითარების მიზნით, მოკლე ვადებში გადაწყდეს მიმდინარე პროექტების სამომავლო პერსპექტივები.
მრგვალი მაგიდა ხვალ 15 საათზე გაიმართება.