საქართველოს კულტურისა და ძეგლთა დაცვის სამინისტროს ინფორმაციით, 2012 წლის საშობაო ბაზრობაზე საქართველო საპატიო სტუმრის სტატუსით იქნება წარმოდგენილი.

საშობაო ბაზრობაზე კულტურულ ღონისძიებათა პროგრამას საქართველოს კულტურისა და ძეგლთა დაცვის სამინისტრო წარმოადგენს.

24 ნოემბერს, ევროპის საპარლამენტო ქალაქში საშობაო ბაზრობის გახსნას საქართველოს კულტურისა და ძეგლთა დაცვის მინისტრი გურამ ოდიშარია, მინისტრის პირველი მოადგილე ალექსანდრე მარგიშვილი და სხვა ოფიციალური პირები დაესწრებიან.

საპატიო სტუმრის სტატუსით საქართველო, როგორც სტრასბურგის საშობაო ბაზრობის თანამასპინძელი, “ქართულ სოფელს” და კულტურულ ღონისძიებებს გამართავს.

სამინისტროს პრესსამსახურის ინფორმაციითვე, საქართველოს მოწვევის გადაწყვეტილება სტრასბურგის მერიამ მიიღო, სადაც განაცხადი რამდენიმე ქვეყნიდან იყო შესული. 2012-2013 წლის საშობაო ბაზრობის სტუმარ ქვეყანასთან დაკავშირებით არჩევანი, საქართველოსა და იაპონიას შორის, საქართველოს სასარგებლოდ გაკეთდა. სტუმრის შერჩევის კრიტერიუმებიდან უმთავრესია დემოკრატიისა და ადამიანის უფლებათა დაცვის დონე ქვეყანაში; ასევე მნიშვნელოვანია საერთო ევროპული ფასეულობების პატივისცემა.

კულტურული პროგრამის ფარგლებში კონცერტებს ჩაატარებენ „სუხიშვილები“, „რუსთავი“, „ლაშარი“, ასევე პიანისტი ხატია ბუნიათიშვილი, ჯაზმენი ბექა გოჩიაშვილი ამერიკელ მუსიკოსებთან ერთად და მომღერალი თამთა ცხვიტავა. წარმოდგენებს გამართავენ პანტომიმისა და თითების თეატრები, შედგება ფოტოგრაფთა ექსპოზიცია, საბავშვო პროგრამა “თიხიანი ხელები” და მოეწყობა ქართული კინოჩვენებები.
“ქართული სოფელი” კი საქართველოს ყველა კუთხის გასაცნობად, გუტენბერგის მოედანზე, ქართულ სამზარეულოს, ეროვნულ პროდუქციას, ნაციონალურ სამოსს, საიუველირო ნაწარმს, ქართულ ღვინოს, სუვენირებს, ხელნაკეთ ნივთებსა და თოჯინებს, ქართულ საახალწლო სიმბოლიკას წარმოადგენს.

სტრასბურგის საშობაო გამოფენას ყოველწლიურად 4 მილიონი ადამიანი სტუმრობს.