„თბილისის სატრანპორტო კომპანია“ დღეს სხვადასხვა სატელევიზიო ეთერის საშუალებით გავრცელებულ ინფორმაციას ეხმიანება მას მოსახლეობის შეცდომაში შეყვანის მცდელობად აფასებს.

ამასთან დაკავშირებით, კომპანიამ სპეციალური განცხადება გაავრცელა.

„დღეს, სხვადასხვა სატელევიზიო ეთერის საშუალებით გავრცელდა კადრები თბილისის სატრანსპორტო კომპანიის კუთვნილი #2 ავტოპარკიდან, თითქოსდა მძღოლები მხოლოდ ცხრა დღეს მუშაობენ და გაურკვეველი წარმოშობის 16.000 ლარის ჯარიმები დაერიცხათ.
თბილისის სატრანსპორტო კომპანია სრული პასუხისმგებლობით აცხადებს, რომ აღნიშნული არის სიცრუე და ემსახურება მოსახლეობის შეცდომაში შეყვანას. იმისათვის რომ გამოირიცხოს მომავალში მსგავსი მანიპულაციები, სატრანსპორტო კომპანია იწყებს დეტალური ინფორმაციის გამოქვეყნებას მძღოლების მიერ 2012 წელს ფაქტობრივად გამომუშავებული შრომის ანაზღაურების შესახებ“ - ნათქვამია სატრანსპორტო კომპანიის განცხადებაში.
მათ მიერვე, პირველ ეტაპზე გამოქვეყნებული ინფორმაციის თანახმად, #2 ავტოპარკში (საანგარიშო პერიოდი 2012 წლის ოქტომბერი) მძღოლთა რაოდენობა 296 ადამიანს შეადგენდა, რომელთა მიერ ნამუშევარი დღეების საშუალო რაოდენობამ თვეში 11,1 დღე შეადგინა. კომპანიის ინფორმაციითვე, მძღოლების საშუალო (დარიცხული) ხელფასის რაოდენობა საანგარიშო პერიოდში 1 016 ლარს შეადგენდა, ხოლო მათი საშუალო დღიური ხელფასი 91,5 ლარი იყო.
ამასთან, მძღოლთა ჯამურმა ხელფასმა ოქტომბერში 300 795 ლარი შეადგინა, ხოლო დისციპლინარული სასჯელების გამო დაქვითული თანხა 575 ლარს უტოლდება.