არასამთავრობო ორგანიზაცია „დევნილი სამოქალაქო საზოგადოების კოალიცია“ დევნილ და სოციალურად დაუცველ სამოქალაქო საზოგადოებას სხვადასხვა ობიექტებზე შეჭრისგან მაქსიმალური თავშეკავებისკენ მოუწოდებს.

როგორც „დევნილი სამოქალაქო საზოგადოების კოალიციის“ ხელმძღვანელმა ლელა გულედანმა დღეს გამართულ პრესკონფერენციაზე აღნიშნა, ორგანიზაციამ თბილისის მასშტაბით სხვადასხვა ობიექტებზე დევნილების შეჭრის ფაქტები შეისწავლა, რამაც გამოააშკარავა, რომ ობიექტებზე დევნილებთან ერთად ის ადგილობრივი მოსახლეობა შედის, რომელთა სოციალური ფონიც ძალიან მძიმეა.

მისი თქმით, არსებულმა მდგომარეობამ კიდევ ერთხელ დაადასტურა, რომ დევნილთა მიმართ წინა მთავრობის პოლიტიკა შესაცვლელია.

გულედანის განცხადებით, ობიექტებზე შეჭრილი მოქალაქეები თავიანთ არასწორ მოქალაქეობრივ პოზიციას აცნობიერებენ და აცხადებენ, რომ იძულებულნი არიან ძველი მთავრობის მიმართ წლების განმავლობაში დაგროვილი პროტესტი ახლა გამოხატონ.

„დევნილ და არადევნილ მოქალაქეებს მივმართავთ, მაქსიმალურად შეიკავონ თავი ასეთი ტიპის ქმედებებისგან და როგორც ამ ქვეყნის ღირსეულმა მოქალაქეებმა ხელი შეუწყონ მთავრობის გადაბარების პროცესს, რათა მათი პრობლემები დროულად და უმტკივნეულოდ მოგვარდეს“ - განაცხადა გულედანმა.

ამასთან, გულედანი დევნილთა და განსახლების ახალ მინისტრ დავით დარახველიძეს და თბილისის მერიას მიმართავს, ობიექტებზე შეჭრის ფაქტებთან დაკავშირებით სტრატეგია რაც შეიძლება სწრაფად შემუშავდეს, რომელშიც ორივე მხარის ინტერესები დაცული იქნება.