„საქართველოს რკინიგზის“ ყოფილმა თანამშრომლებმა კომპანიის მგზავრთა გადაყვანის სამსახურის უფროსის თეიმურაზ ბულიას თანამდებობიდან გათავისულების მოთხოვნით აქცია გამართეს.

აქციის მონაწილეთა განცხადებით, ბულიას ხელმძღვანელობისას ისინი სამსახურიდან უსამართლოდ გაათავისუფლეს.

„სამი წლის წინ, ერთ დღეს გამომიცხადეს, რომ სამსახურიდან ვარ დათხოვილი, მიზეზი ვერ გავიგე. 25 წელი რკინიგზაში ვმუშაობდი და კვალიფიკაციის პრობლემა ნამდვილად არ მქონდა. უბრალოდ, საკუთარი კადრების მოყვანა უნდოდათ. ეს უნდა დასრულდეს და პროფესიონალები დაგვაბრუნონ“ - აცხადებს ყოფილი მემანქანე თამაზ კუპრეიშვილი.

„საქართველოს რკინიგზის“ პროფკავშირის წარმომადგენლის გია ყრუაშვილის ინფორმაციით, რკინიგზაში დაახლოებით 5 ათასი ადამიანია, რომლებიც მიიჩნევენ, რომ სამსახურიდან უსამართლოდ გაათავისუფლეს.

აქციის მონაწილეებმა საკითხის გარკვევის მიზნით ბულიასთან შეხვედრა სცადეს, თუმცა, როგორც მგზავრთა გადაყვანის სამსახურში განუცხადეს, იგი ქალაქში არ იმყოფება.

რკინიგზის თანამშრომლებმა ბიძინა ივანიშვილის სახელზე მიმართვა შეიმუშავეს. ისინი ახალი პრემიერისგან რკინიგზის ხელმძღვანელობის გათავისუფლებას და ახლის დროულად დანიშვნას ითხოვენ. მას ივანიშვილს 29 ოქტომბერს გაუგზავნიან.