თბილისის საკრებულო დასუფთავების გადასახადის შემცირების ახალ მოდელს ხვალ სხდომაზე წარადგენს.

საკრებულოს დეპუტატებმა დასუფთავების ტარიფზე დღეს კომისიების ერთობლივ სხდომაზე იმსჯელეს და თბილისის მერიის მიერ შემუშავებული გადასახადის 50%-ით შემცირების მოდელი განიხილეს, რაც 1 კვტსთ. გახარჯულ ელენერგიაზე 2,5 თეთრს ითვალისწინებს.

კერძოდ, თუ დღემდე მოხმარებული 100 კილოვატსაათ ელექტროენერგიაზე მოსახლე 1 კვტსთ-ში 5 თეთრს იხდიდა, ეს ციფრი 2.5 თეთრამდე შემცირდა.

ამასთან, როგორც სხდომაზე დეპუტატმა „ნაციონალური მოძრაობიდან“ კოკი იონათამიშვილმა განაცხადა, ძალაში დარჩება სოციალურად დაუცველ პირთა შეღავათიები და ისინი 2.5 თეთრის ნახევარს გადაიხდიან.

თბილისის მოსახლეობა, აღნიშნული მოდელით, დასუფთავების გადასახადს ზამთრის სეზონზე - ნოემბერ-მარტში გადაიხდის.

სხდომაზე დამოუკიდებელმა დეპუტატმა კახა კუკავამ საკითხის გადადების შესახებ წინადადება წამოაყენა და განაცხადა, რომ უმჯობესია მისი განხილვის გადადება და გადაწყვეტილების ახალ მთავრობასთან შეთანხმებით მიღება.

კუკავას განმარტებით, ფინანსთა მინისტრმა ნოდარ ხადურმა, რამდენჯერმე განაცხადა, რომ სისტემის მთლიანად შეცვლას გეგმავს, რაც ელექტროენერგიისა და დასუფთავების გადასახადის განცალკევებას გულისხმობს.

„ხალხმა გააკეთა არჩევანი, ხოლო „ქართული ოცნების“ დაპირება იყო, სისტემის გაუქმება. ამიტომ, არანაირი მნიშვნელობა არ აქვს საკრებულოს ამ გადაწყვეტილებას, რადგან ეს არის მიზერული ცვლილება. მინდა ვთხოვო ცენტრალურ მთავრობას კიდევ ერთხელ დაინტერესდეს და მის მიერ გაცემული დაპირების შესრულება დაიწყოს“-განაცხადა კუკავამ.

„ნაციონალური მოძრაობის“ წარმომადგენელთა განცხადებით, თბილისის მერიამ ამ მოდელის შეთავაზებით, საუკეთესო გადაწყვეტილება მიიღო.

„დღეისთვის ეს არის ყველაზე ოპტიმალური ვარიანტი და ყველაზე კარგი გამოსავალი. ამ მოდელს გარკვეული დოტაცია სჭირდება. მერია ამაზე მუშაობს და ბიუჯეტის დამტკიცებისას ამ საკითხსაც განიხილავს“-განაცხადა იონათამიშვილმა.

თბილისის საკრებულომ აღნიშნული მოდელი ხვალიდნელ სხდომაზე უნდა დაამტკიცოს.