ქართველმა ემიგრანტებმა დღეს არასამთავრობო ორგანიზაცია - „მე დავბრუნდები“ დაარსეს. ორგანიზაციის დამფუძნებლები საბერძნეთიდან, თურქეთიდან და აშშ-დან საქართველოში დაბრუნებული ემიგრანტები მამუკა ლიპარტელიანი, მაია კობაიძე და ინა ოსიძე არიან.

როგორც დღეს სასტუმრო „ჰოლიდეი ინნ“-ში გამართულ პრესკონფერენციაზე ორგანიზაციის დამფუძნებლებმა აღნიშნეს, მათი მიზანი ქართველ ემიგრანტებთან მჭიდრო კონტაქტების დამყარებაა, რადგან ემიგრანტებმა უნდა იცოდნენ, რომ საქართველო მათზე ზრუნავს.

მათივე თქმით, ორგანიზაციის მიზანი ქართველი ემიგრანტების სამოქალაქო და პოლიტიკური უფლებების დაცვაა.

„ორგანიზაციის ამოცანაა, ხელი შეუწყოს ქართველი ემიგრანტების სოციალურ, პოლიტიკურ და კულტურულ ინტეგრაციას იმ ქვეყნებში, სადაც იმყოფებიან, ასევე, კონსტუქციულად ითანამშრომლოს ეკონომიკის, სოფლის მეურნეობისა და დიასპორების სამინისტროებთან“ - განაცხადეს ორგანიზაციის დამფუძნებლებმა.

მამუკა ლიპარტელიანის თქმით, მათ ამერიკაში, თურქეთსა და საბერძნეთში არაერთი წელი უცხოვრიათ, ამიტომ კარგად ესმით ის ტკივილი, რასაც ემიგრანტები სხვადასხვა ქვეყანაში განიცდიან.


„კარგად ვიცით, რა წინაპირობა შექმნა მთავრობამ ემიგრანტებისთვის, რომ არჩევნებში მონაწილეობა არ მიეღოთ. ამ არჩევნებმა ემიგრანტებს საქართველოში დაბრუნების იმედი ჩაუსახა“ - აღნიშნა მან.

მისი თქმით, ამ ეტაპზე ორგანიზაციას დაფინანსება არ აქვს, თუმცა, სხვადასხვა პროექტების განსხორციელებლად და დაფინანსების მოსაპოვებლად იმუშავებს.

როგორც ინა ოსიძემ აღნიშნა, ისინი თურქეთში მცირე ფაბრიკებთან, რომლებიც თანახმა არიან თავიანთი საქმიანობა საქართველოში განაგრძონ, მოლაპარაკებას აწარმოებენ და ემიგრანტები სწორედ ამ ფაბრიკების საქმიანობას გაუწევენ კურირებას.