რუსულენოვანი ტელეკომპანია „პირველი კავკასიურის“ თანამშრომლები, მაუწყებლობის გაგრძელების მოთხოვნით, ამ წუთებში ქუთაისში უმაღლესი საკანონმდებლო ორგანოს შენობის წინ საპროტესტო აქციას მართავენ.

ტელეკომპანიის წარმომადგენლებმა პარლამენტის წინ სიმბოლურად საინფორმაციო გამოშვების ინსცენირება მოახდინეს, კერძოდ, მოაწყეს მინისტუდია, დადგეს სუფლიორი და „საინფორმაციო გამოშვებაში“ „პიკის“ განვლილ საქმიანობაზე ისაუბრეს.

როგორც „ნიუსპრესს“ „პიკის“ ჟურნალისტმა ნანა პლიევამ განუცხადა, მათი მოთხოვნაა საზოგადოებრივ მაუწყებელში აუდიტის სამსახურის შესვლა და იმ თანხების ხარჯვის საკითხის შესწავლა, რომელიც სახელმწიფო ბიუჯეტიდან „პიკის“ მაუწყებლობისთვის იყო განკუთვნილი. კერძოდ, თანამშრომლებს აინტერესებთ სად გაქრა წლიური 14 მლნ-დან დარჩენილი 2 მლნ ლარი, რომელიც წლის ბოლომდე ტელევიზიას უნდა მოხმარებოდა.

„პიკის“ ჟურნალისტები მათი მაუწყებლობის შეწყვეტის მიზეზად, ეთერში გასულ იმ გადაცემას ასახელებენ, სადაც მათ ლეგიტიმური კითხვები დასვეს.

„ჩვენ პირდაპირ ეთერში დავსვით კითხვები თუ რატომ მოგვხსნეს სატელიტიდან, სად წავიდა „პიკისთვის“ განკუთვნილი თანხები და რა ბედი ეწევა ჩვენს ტელევიზიას. აღნიშნული კითხვები საზოგადოებრივი მაუწყებლის ხელმძღვანელმა გია ჭანტურიამ „შეუთანხმებელ კითხვებად“ მიიჩნია, რის გამოც მაუწყებლობა შეგვიწყვიტა“ - განაცხადა პლიევამ.

ტელევიზიაში 400-მდე ადამიანია დასაქმებული.

ტელევიზიის წარმომადგენლები საკანონმდებლო ორგანოს და პარლამენტის თავმჯდომარეს დავით უსუფაშვილს სთხოვენ, საზოგადოებრივ მაუწყებელში აუდიტის სამსახურის შესვლას, რომელიც შეისწავლის ტელევიზიისთვის განკუთვნილი თანხების ხარჯვის მიზობრიობას და ტელევიზიის დახურვის მიზეზს.

„პიკის“ მხარდამჭერ აქციას სოლიდარობას უცხადებს უკრაინის დამოუკიდებელი პროფკავშირი, რომელიც კიევში, საქართველოს საელჩოსთან გამართავს მდუმარე აქციას სახელწოდებით „ჩვენ ვდუმვართ, მაგრამ ჩვენი დუმილი მრავლისმთქმელია“ .

„პიკის“ თანამშრომლებს მხარს უჭერენ სერბ ჟურნალისტთა კავშირი, ხორვატიის მედიაპროფკავშირი, ბელორუსის ჟურნალისტების ასოციაცია და კავკასიისა და შუა აზიის ჟურნალისტური ორგანიზაციების ქსელის აზერბაიჯანული განყოფილება.