ილიას სახელმწიფო უნივერსიტეტის პალეოურბანული კვლევის ლაბორატორია დღეს წიგნის მაღაზია „ლიგამუსში” ციხესულორის არქეოლოგიური ექსპედიციის კვლევა-ძიების შედეგებს წარადგენს.

როგორც „ნიუსპრესს“ ილიას სახელმწიფო უნივერსიტეტიდან აცნობეს, ვექტორთა სისტემამ, რომელიც ფასისიდან იღებს სათავეს, არქეოლოგიური კვლევა-ძიების არეალად სოფელი ციხესულორი განსაზღვრა.

მათივე ცნობით, თეორიულ კვლევის პარალელურად მიმდინარეობდა ტოპონიმიკური ძიება და ლანდშაფტის ანალიზიც, თეორიულმა კვლევებმა კი პრაქტიკული დადასტურება მოითხოვა და სწორედ ამან განაპირობა ციხესულორში გათხრების წარმართვა.

ილიაუნის ინფორმაციით, ექსპედიცია ძირითადად სტუდენტური იყო. გათხრებმა კი, დაადასტურა როგორც ადრეანტიკური პერიოდის, ასევე ელინისტური ხანის ფენებისა და არტეფქტების სიმრავლე და მათ შორის ისეთი ელემენტები, რომლებიც მონუმენტურ არქიტექტურას განეკუთვნება და მხოლოდ ქალაქის კუთვნილი შეიძლება იყოს.

მათივე განმარტებით, ციხესულორის არქეოლოგიური გათხრები ქალაქ „სურიუმის“ ურბანული სისიტემის შესწავლის მხოლოდ დასაწყისია და მას სპეციალისტთა და სტუდენტ-არქეოლოგთა არაერთი თაობა გააგრძელებს.

შედეგებს პროფესორი გურამ ყიფიანი და დოქტორანტი მადონა მშვილდაძე წარადგენენ.