საზოგადოებრივი ორგანიზაციები და გაერთიანებები საქართველოს პარლამენტს სახალხო დამცველის პოზიციაზე თამარ გურჩიანის დამტკიცებას სთხოვენ. შესაბამისი მიმართვა ორგანიზაციებმა დღეს გაავრცელეს.

როგორც მიმართვაშია ნათქვამი, აღნიშნულ პოსტზე გურჩიანი თავდაპირველად 39-მა ორგანიზაციამ წარადგინა, თუმცა, დღეს მხარდამჭერთა რაოდენობა ასზე მეტია და მათი რიცხვი სულ უფრო იზრდება. ამასთან, ორგანიზაციები მიიჩნევენ, რომ გურჩიანის კანდიდატურა თანაბრადაა მისაღები სამოქალაქო და პოლიტიკური უფლებებზე, სოციალურ, გარემოსდაცვით, კულტურული მემკვიდრეობის დაცვის თემატიკაზე მომუშავე, ქალთა, ბავშვთა, შეზღუდული შესაძლებლობის მქონე პირების, სხვადასხვა სახის მოწყვლადი ჯგუფების უფლებებადამცველთა და დამოუკიდებელი მედია ორგანიზაციებისათვის.

„უკანასკნელ დღეებში მედიით გავრცელებულმა ინტერვიუებმა თამარ გურჩიანთან და კანდიდატებს შორის ტელე-დებატებმა კიდევ ერთხელ დაგვარწმუნა იმაში, რომ თამარ გურჩიანი არის პოლიტიკურად მიუკერძოებელი, პრინციპული, მაღალი კვალიფიკაციის სამართალმცოდნე და აქვს ადამიანის უფლებების დაცვის სფეროში მუშაობის დიდი გამოცდილება“-აღნიშნულია მიმართვაში, რომელსაც ხელს 112 ორგანიზაცია აწერს.

საქართველოს პარლამენტმა სახალხო დამცველი უახლოეს დღეებში უნდა დაამტკიცოს. გურჩიანის გარდა აღნიშნულ პოსტზე ადვოკატების - ლია მუხაშავრიას და გელა ნიკოლაიშვილის, ასევე, ყოფილი დეპუტატის, დიმიტრი ლორთქიფანიძის კანდიდატურა განიხილება.

ომბუდსმენის თანამდებობა ვაკანტური მას შემდეგ გახდა, რაც ყოფილი სახალხო დამცველი გიორგი ტუღუში სასჯელაღსრულების, პრობაციისა და იურიდიული დახმარების მინისტრის მოვალეობის შემსრულებლად დაინიშნა.