რუსულენოვანი ტელეკომპანია „პირველი კავკასიურის“ თანამშრომლები მიიჩნევენ, რომ არხის მაუწყებლობის გათიშვის ძირითადი მიზეზი ფინანსური პრობლემაა და პარლამენტს „პიკსა“ და საზოგადოებრივ მაუწყებელში რიგგარეშე აუდიტის ჩატარების თხოვნით მიმართავენ.

როგორც დღეს „რია ნოვოსტის“ საერთაშორისო პრესცენტრში გამართულ მრგვალ მაგიდაზე აღინიშნა, 25 ოქტომბერს „პიკის“ კოლექტივი პარლამენტის თავმჯდომარის დავით უსუფაშვილის სახელზე შესაბამის წერილს შეიტანს და უმაღლესი საკანონმდებლო ორგანოს შენობასთან აქციას გამართავს.

როგორც საინფორმაციო სამსახურის ყოფილმა ხელმძღვანელმა ეკატერინე კოტრიკაძემ განაცხადა, „პიკი“ საზოგადოებრივ მაუწყებელთან კონტრაქტით გათვალიწინებულ ყველა ვალდებულებას ასრულებდა და ტელეკომპანიის კოლექტივის უფლებების დასაცავად ყველა შესაბამის ორგანიზაციას მიმართავს.

მისი თქმით, მთავარი კითხვა, რომელსაც კოლექტივი სვამს არის - სადაა ის თანხა, რომელიც ტელეკომპანიისთვის წლის ბოლომდე იყო გამოყოფილი. წლის ბოლომდე „პიკის“ ბიუჯეტში 2 მლნ-ზე მეტი ლარი უნდა იყოს დარჩენილი. სულ წლის განმავლობაში ტელეკომპანიისთვის 14 მლნ ლარია გათვალისწინებული.

დისკუსიაში მონაწილე სხვადასხვა არასამთავრობო ორგანიზაციისა და ექსპერტების განმარტებით, როგორც საქართველოს ისე მთლიანად კავკასიის რეგიონისთვის საჭიროა რუსულენოვანი ტელეკომპანიის მაუწყებლობა.

„საქართველო დღეისთვის ახალ პირობებში იმყოფება. ახლა გაცილებით იზრდება „პიკის“ არსებობის აუცილებლობა. თუ სარედაქციო პოლიტიკის კორექტირებაა საჭირო, ამის განხორციელება შეიძლება იმ პროფესიონალი კოლექტივის პირობებში, რომელიც ტელეკომპანიას ჰყავს“-განაცხადა პოლიტოლოგმა გიორგი ხუციშვილმა.

დისკუსიაში პოლიტოლოგის რანგში მონაწილე მამუკა არეშიძე მიიჩნევს, რომ „პიკის“ შენარჩუნება მთლიანად კავკასიის ინტერესებშია და მისი მაუწყებლობის შეჩერებას „გარკვეული პოლიტიკური სუნი უდის“, რაშიც პოლიტოლოგის აზრით, ახალი ხელისუფლება აუცილებლად უნდა გაერკვეს.

საერთაშორისო საგანმანათლებლო საზოგადოება „რუსული კლუბის“ პრეზიდენტი ნიკოლაი სვენტიცკი მიიჩნევს, რომ თავიდან არხი შეიქმნა, როგორც წინა ხელისუფლების პროპაგანდის იარაღი და ის ტენდენციური მაუწყებელი იყო. თუმცა, მისი თქმით, რუსულენოვანი ტელეარხი „პიკი“ უნდა შენარჩუნდეს.

რაც შეეხება „პიკის“ კოლექტივის მიერ სასამართლოში სარჩელის შეტანას, კოტრიკაძის თქმით, ეს ხანგრძლივი პროცედურაა და მათ ურჩევნიათ, საკითხის უმტკივნეულოდ მოგვარება. თუმცა, იურისტებთან კონსულტაციებს უკვე აწარმოებენ.

„პიკის“ თანამშრომლების ინფორმაციით, 25 ოქტომბერს საზოგადოებრივი მაუწყებლის სამეთვალყურეო საბჭოს სხდომაა დაგეგმილი, რომელზეც არხის დახურვის შესახებ მაუწყებლის გენდირექტორის გადაწყვეტილება განიხილება.

„პიკის“ წარმომადგენლები დღეს აშშ-ს საელჩოს პრეს-ატაშეს შეხვდებიან.