არასამთავრობო ორგანიზაცია „ეროვნულ-რელიგიური ინსტიტუტი“ ახალი ხელისუფლებისგან აზატრული თამაშების შეზღუდვის მიზნით კონკრეტული ნაბიჯების გადადგმას ითხოვს. ამის შესახებ ორგანიზაციის წარმომადგენლებმა დღეს გამართულ პრესკონფერენციაზე განაცხადეს.

„ეროვნულ-რელიგიური ინსტიტუტის“ ხელმძღვანელის ზვიად ტომარაძის განმარტებით, აზატრულ თამაშებზე დამოკიდებული ადამიანების რაოდენობა ყოველდღიურად იზრდება, რაც შეუზღუდავი სარეკლამო კამპანიითაა განპირობებული.

მისი თქმით, ქალაქში აგრეთვე, არნახული მასშტაბებით იმატებს სლოტ-კლუბებისა და სამორინეების რაოდენობა, ქართულ ინტერნეტ ბაზარზე ახალ-ახალი კომპანიები იქმნება, რომლებიც მომხმარებლებს სწრაფ გამდიდრებას სახლიდან გაუსვლელად სთავაზობენ.

„შედეგად ქვეყანაში სავალალო მდგომარეობას და კიდევ უფრო დამძიმებულ სოციალურ გარემოს ვიღებთ“ - აღნიშნა ტომარაძემ.

მისივე თქმით, ყოველივე ამას ხელს უწყობს ინტერნეტ თამაშების ინტენსიური რეკლამირება და ასევე, სათამაშო ბიზნესის რეკლამა საზოგადოებრივ ტრანსპოტზე თუ თავშეყრის ადგილებში.

როგორც ტომარაძემ აღნიშნა, აზარტული თამაშები აკრძალულია თურქეთსა და აზერბაიჯანში, ხოლო სომხეთში კაზინოები მხოლოდ სამ რეგიონშია დაშვებული. ასევე, სათამაშო ბიზნესი ნებადართულია რუსეთის მხოლოდ ოთხ რეგიონში.
აქედან გამომდინარე, „ეროვნულ-რელიგიური ინსტიტუტი“ მოითხოვს სათამაშო ბიზნესის რეკლამირების აკრძალვას საინფორმაციო საშუალებებით, ხოლო საზოგადოებრივი თავშეყრის ადგილებში მკვეთრად შეზღუდვას.

ამასთან, ორგანიზაციას მიზანშეწონილად მიაჩნია, რომ სათამაშო ბიზნესი დაშვებული იყოს მხოლოდ ისეთ ტერიტორიულ ზონებში, რომლებიც ეკონომიკური განვითარებით დანარჩენ რეგიონებს მკვეთრად ჩამორჩებიან. ორგანიზაციამ სათამაშო ბიზნესის შეზღუდვის მოთხოვნით პეტიცია შეიმუშავა, რომელსაც პრემიერ-მინისტრობის კანდიდატს ბიძინა ივანიშვილს უახლოეს მომავალში წარუდგენს.