კოალიცია „ქართული ოცნების“ საგარეჯოს მაჟორიტარი დეპუტატობის კანდიდატის თინა ხიდაშელის განცხადებით, ჭიათურის პატარიძის მაღაროსა და კომპანია „თელასის“ გაფიცული თანამშრომლების პრობლემების მოგვარებაზე ერთიანი პასუხი არ არსებობს.
როგორც მან ჟურნალისტებს განუცხადა, ყველას საქმე ინდივიდუალურია, შესაბამისად, ინდივიდუალურად შევისწავლით და პასუხი საქმის სიმძიმის მიხედვით გაეცემა.
„იმას თუ რატომ არიან დღეს ისინი ქუჩაში, ერთადერთი ახსნა აქვს - იმიტომ, რომ თავისუფლება იგრძნეს. ეს 1 ოქტომბრის შედეგია, როდესაც საქართველოს მოსახლეობის უდიდესმა ნაწილმა დაიჯერა, რომ შიშის ეპოქა დასრულდა“-განაცხადა ხიდაშელმა.
მისი თქმით, 1 ოქტომბერს მოსახლეობამ დაინახა, რომ პრობლემებზე ღიად საუბარი შესაძლებელია, რაც მისასალმებელია.
„ველოდები, რომ უახლოესი კვირებისა და თვეების განმავლობაში ძალიან ბევრ ისეთ რამეს გავიგებთ, რაზეც აქამდე არც ინფორმაცია გვქონდა და არც ჭორად გვსმენია“-აღნიშნა ხიდაშელმა.
კომპანია „თელასის“ ყოფილი თანამშრომლები რამდნეიმე დღეა საპროტესტო აქციებს მართავენ. ისინი, კომპანიის ხელმძღვანელობის გადადგომასა და სამსახურში დაბრუნებას მოითხოვენ. როგორც ცნობილი გახდა, დღეს „თელასის“ რამდენიმე ბიზნესცენტრის თანამშრომლებიც გაიფიცნენ.
რაც შეეხება გაფიცულ მაღაროელებს, ისინი ხელფასების 100%-ით მომატებას და სამუშაო პირობების გაუმჯობესებას ითხოვენ.
