კოალიცია „მედიის ადვოკატირებისთვის“ წევრი არასამთავრობო ორგანიზაციები საქართველოში მედიაგარემოს გაუმჯობესების აუცილებლობაზე საუბრობენ და ახალ ხელისუფლებას ამ მიზნით რეკომენდაციებს სთავაზობენ.
კოალიცია მიიჩნევს, რომ აუცილებელია საზოგადოებრივი მაუწყებლის დამოუკიდებლობა და განვითარება, კონკრეტულად მისი ფინანსური ხარჯებისა და ტელეკომპანია „პიკ“-ის მმართველ კომპანიასთან გაფორმებული ხელშეკრულების გასაჯაროება, Must Carry და Must Offer-ის რეგულირება მაუწყებლის შესახებ კანონით, სასამართლო სისტემის გამჭვირვალობა, ინფორმაციის თავისუფლება-ინფორმაციის ხელმისაწვდომობა, ციფრულ მაუწყებლობაზე გადასვლა, აჭარის ტელევიზიის სამართლებრივი სტატუსის გადაჭრა, საჯარო პირებისა და საჯარო დაწესებულებების მხრიდან მედიასთან ურთიერთობის სტანდარტების შეცვლა და კომუნიკაციების ეროვნული კომისიის ფორმირების წესებისა და ფუნქციების განხილვა.

ამასთან, კოალიციის წევრები სისტემის გამჭვირვალობის მიზნით სასამართლოში ფოტო და ვიდეოგადაღების დაშვებას ითხოვენ და ასევე მიიჩნევენ, რომ აუცილებლად უნდა იქნეს გამოძიებული ჟურნალისტებზე განხორციელებული ნებისმიერის სახის ძალადობის ფაქტები.

კოალიცია „მედიის ადვოკატირებისთვის“ წევრთა განცხადებით, აღნიშნულ საკითხებთან დაკავშირებით ახალი მთავრობის წევრები ინფორმირებული არიან. რამდენიმე მათგანი, ვიდრე მთავრობაში მოვიდოდა, დასახელებული პრინციპების ჩამოყალიბების პროცესშიც აქტიურად იყო ჩართული. თუმცა, ორგანიზაციის წევრებსა და ახალ ხელისუფლებას შორის ოფიციალური შეხვედრა ჯერ არ გამართულა.