უმუშევრობის პრობლემის დასაძლევად სერიოზული პროექტები დაიგეგმა. ამის შესახებ პრეზიდენტის პრესსპიკერმა მანანა მანჯგალაძემ დღეს გამართულ ტრადიციულ ბრიფინგზე განაცხადა.
"პარლამენტში თავის ყოველწლიურ გამოსვლაში პრეზიდენტმა საინტერესო ინიციატივები გააჟღერა, რომელიც რამდენიმე სერიოზულ გამოწვევას ეხებოდა. მათ შორის, უმთავრესი უმუშევრობის პრობლემაა. ამ მიმართულებით სერიოზული პროექტები დაიგეგმა. საუბარია ინვესტიციების შემოსვლაზე, ახალი ჰესების და კლინიკების მშენებლობაზე. თითოეულ ამ სექტორში რამდენიმე ათეული ადამიანი დასაქმდება,"- განაცხადა მანჯგალაძემ.
მისივე განმარტებით, დემოგრაფიული ვითარების კუთხით პოზიტიური ტენდენციები შეინიშნება და ამას პრეზიდენტის ინიციატივაც შეუწყობს ხელს.
"2013 წლიდან ოჯახები ოთხ ან მეტ შვილზე სახელმწიფოსაგან 18 წლამდე უფასო დაზღვევის პაკეტს მიიღებენ. გაგრძელდება სკოლების და სასწავლებლების მშენებლობა, დიდი ყურადღება დაეთმობა პროფესიულ სწავლებას. სოფლის მეურნეობის სფეროში მექანიზაციის 12 ცენტრი გაიხსნება,"- განმარტა მანჯგალაძემ.