ტელეკომპანია „იმედი“ ფორმატს იცვლის და საინფორმაციო ფორმატზე გადადის.
ამის შესახებ „იმედის“ მიერ გავრცელებულ განცხადებაშია ნათქვამი.
განცხადებაში აღნიშნულია, რომ ჩატარებული საპარლამენტო არჩევნებით საქართველომ მსოფლიოს დემოკრატიის სანიმუშო მაგალითი აჩვენა, დემოკრატიის ხარისხის დაცვა და გაუმჯობესება კი ტელეკომპანიას ძალიან მნიშვნელოვნად მიაჩნია.
„აშკარაა, რომ ჩვენი ბოლო წლების საერთო მცდელობა - აგვეშენებინა დემოკრატიული საქართველო, წარმატებით მიმდინარეობს. ამიტომ მიგვაჩნია, რომ ახლა, როგორც არასდროს, მნიშვნელოვანია უკვე მიღწეული დემოკრატიის ხარისხის დაცვა და უფრო მეტად განვითარება. ახლა, როგორც არასდროს, მნიშვნელოვანია სიტყვის თავისუფლების უზენაესობის ერთგულება და ჯანსაღი პოლიტიკური კონკურენციისა და კონსტრუქციული ოპონირების გარემოს შენარჩუნება“-ნათქვამია „იმედის“ განცხადებაში.
ტელეკომპანიას თავის განსაკუთრებულ პასუხისმგებლობად მიაჩნია საზოგადოების მიუკერძოებელი, ობიექტური და დაბალანსებული ინფორმირება უზრუნველყოს ქვეყნის პოლიტიკურ და საზოგადოებრივ ცხოვრებაში მიმდინარე პროცესების შესახებ. ამიტომ „იმედი“ იცვლის ფორმატს და იწყებს ეტაპობრივ გადასვლას ძირითადად სამაუწყებლო - საინფორმაციო ფორმატზე.
ტელეკომპანია აცხადებს, რომ საზოგადოებას მთელი დღის განმავლობაში მიაწვდის ახალ ამბებს, ეთერს დაუთმობს სხვადასხვა პოლიტიკური პარტიების წარმომადგენლებს და მაყურებელს შესთავაზებს პოლიტიკური და სოციალური ხასიათის თოქშოუებს.
„ახლა, ტელეკომპანია იმედის, ისევე, როგორც ყველა ჟურნალისტის, ყოველი მოქალაქისა და მათ შორის ახალი, დემოკრატიული წესით არჩეული ხელისუფლების ვალია - დავიცვათ და გავუფრთხილდეთ ჩვენი ქვეყნის დემოკრატიულ მონაპოვარს. იმედი გვაქვს, რომ ახალი ხელისუფლება ღირსეულად გააგრძელებს წინა ხელისუფლების მიერ დატოვებულ დემოკრატიულ მემკვიდრეობას, ხელს არ შეუშლის თავისუფალ მედიის მუშაობას და არანაირი ფორმით არ შეეცდება თავისუფალი სიტყვის შეზღუდვას“- ნათქვამია „იმედის“ განცხადებაში.
