ხაშურში საარჩევნო უბნებთან შექმნილ დაძაბულ სიტუაციასთან დაკავშირებით „საერთაშორისო გამჭირვალობა-საქართველო“ განცხადებას ავრცელებს.

ორგანოზაციის ინფორმაციით, ხაშურის ოლქის რამდენიმე უბანზე სპეცდანიშნულების რაზმები შევიდნენ და შემაჯამებელი ოქმები გადააკეთეს.

„46-ე უბანზე მყოფი ჩვენი დამკვირვებლის თქმით, ხმების დათვლის დროს შემჯამებელ ოქმში დაფიქსირდა, რომ „ქართულმა ოცნებამ” ყველაზე მეტი ხმა მიიღო, თუმცა, მცირე ხნის შემდეგ უბანზე გამოჩნდნენ შეირაღებული პირები, რომლებმაც ყველა დამკვირვებელი შენობიდან გაყარეს. შედეგად, დაიწერა ახალი შემაჯამებელი ოქმი, რომელშიც უკვე „ერთიანმა ნაციონალურმა მოძრაობამ” გაიმარჯვა. საოლქო კომისიამ სწორედ ეს ოქმი ჩაიბარა. ჩვენი კიდევ ერთი დამკვირვებლის ცნობით, სპეცდანიშნულების რაზმი ასევე შეიჭრა მე-19 უბანზე, სადაც დამკვირებლებს ფიზიკურად გაუსწორდნენ და უბნიდან გამოაძევეს “ - აცხადებენ ორგანიზაციაში.

ხაშურში მსგავსი ფაქტების შესახებ ინფორმაცია „გამჭვირვალობას“ ეუთო-ს სადამკვირვებლო მისიამ მიაწოდა, რომლის ინფორმაციით, მე-5 და მე-45 უბანშიც სპეცდანიშნულების რაზმი შეიჭრა. ამასთანავე, ვრცელდება ინფორმაცია, რომ ხაშურის სხვა უბნებზეც იგივე ხდება.

„საერთაშორისო გამჭვირვალობა - საქართველო“ მოუწოდებს შესაბამის ორგანოებს მყისიერი რეაგირება მოახდინონ აღნიშნულ დარღვევებზე და მიიღონ შესაბამისი ზომები, წინააღმდეგ შემთხვევაში, კითხვის ნიშნის ქვეშ დადგება მთლიანი ოლქის შედეგები.