ფილარმონიასთან პატიმართა სოლიდარობის აქციები, რომელიც 9 დღის განმავლობაში პერმანენტულად იმართებოდა, დღეიდან დროებით შეწყდა.
ბოლო აქცია საკონცერტო დარბაზთან დღეს გაიმართა.

როგორც „ნიუსპრესს“ აქციის ერთ-ერთმა ორგანიზატრომა ალექსანდრე კობაიძემ განუცხადა, აქციები ორ ოქტომბრამდე, ანუ საპარლამენტო არჩევნების დასრულებამდე შეწყდება.

კობაიძის თქმით, იმ შემთხვევაში თუ ხელისუფლება არჩევნებს გააყალბებს და პატიმართა წამებაში დამნაშავე პირებს არ დასჯის, აქციები კვლავ განახლდება.

„აქციები 2 ოქტომბრამდე შეწყდება. ჩვენი დევიზია, რომ 1 ოქტომბერს ხელისუფლებას პროტესტი გამოვუცხადოთ საარჩევნო ყუთებთან და იმ შემთხვევაში თუ არჩევნები გაყალბდება პროტესტს გავაგრძელებთ. ამასთან, მოვითხოვთ დაისაჯოს პატიმართა წამებაში მონაწილე ყველა პირი, დაწყებული პირველი პირიდან, დამთავრებული რიგით თანამშრომლამდე, ვინც ამ საქმეში მონაწილეობდა“ - განაცხადა კობაიძემ.

საპროტესტო აქციები ფილარმონიასთან ცხრა დღის განმავლობაში მიმდინარეობდა.

სამოქალაქო საზოგადოებისა და უფლებადამცველების საპროტესტო აქციები მას შემდეგ დაიწყო, რაც რამდენიმე ტელეკომპანიის ეთერით პატიმართა წამების ამსახველი ვიდეო და ფოტომასალა გავრცელდა.