არასამთავრობო ორგანიზაცია „ახალი თაობა-ახალი ინიციატივის“ აღმასრულებელი დირექტორი ქეთევან ჩაჩავა სასტუმრო „თბილისი მარიოტში“ არჩევნების მონიტორინგის  დაწყებასთან დაკავშირებით დღეს სპეციალურ განცხადებას გააკეთებს.

როგორც „ნიუსპრესს“ ორგანიზაციიდან აცნობეს, ორგანიზაციის სადამკვირვებლო მისიის წარმომადგენლები საზეიმო ვითარებაში „დამკვირვებლის ქცევის კოდექსს“ მოაწერენ ხელს, რომელიც პრინციპებისა და სტანდარტების ერთობლიობას წარმოადგენს.

ორგანიზაციის წარმომადგენლების თქმით, „დამკვირვებლების ქცევის კოდექსმა“ თითოეული დაკმვირვებლის მოქმედება და კომპეტენციით განსაზღვრული საქმიანობის შესრულება უნდა უზრუნველყოს.

„დამკვირვებლის ქცევის კოდექსის“ შესრულება ორგანიზაციის ყველა დამკვირვებლისთვისაა სავალდებულო. კოდექსის უგულვებელყოფა ან მისი დარღვევა დამკვირვებლისთვის აკრედიტაციის უფლებამოსილების შეჩერებას განაპირობებს.

ასევე, დღეს საზოგადოებას მიეწოდება ინფორმაცია ორგანიზაციის სადამკვირვებლო მისიის გეგმებთან დაკავშირებით.

პროექტი ნიდერლანდების სამეფოს საელჩოს პროგრამა „მატრას“ ფინანსური მხარდაჭერით ხორციელდება.