იუსტიციის სახლთან მოშიმშილე ახალგაზრდებმა დღეს შიმშილობის აქციას შეწყვიტეს. როგორც „ნიუსპრესს“ ერთ-ერთმა მოშიმშილემ, სტუდენტური გაერთიანება  „ქართველის“ ხელმღვანელმა ვაჟა ქორიძემ განუცხადა, ისინი, რომლებიც რამდენიმე დღის წინ დაკავებულ ახალგაზრდებს სოლიდარობას უცხადებდნენ, უნივერისტეტში უფრო აქტიურები იქნებიან.

მისი თქმით, მოშიმშილეები სტუდენტების მიმდინარე აქციებს შეუერთდებიან და მათ პროტესტს ამგვარად გამოხატავენ.

„უნივერსიტეტში, როგორც დამოუკიდებელი სტუდენტები ქვეყნის სასარგებლოდ უფრო ვიმოქმედებთ, ვიდრე ისე, რომ დავჯდეთ და ყურადღება არავინ მოგვაქციოს“ - განაცხადა ვაჟა ქორიძემ.

როგორც კოალიცია „ქართული ოცნების“ ახალგაზრდული ორგანიზაციის წარმომადგენელმა უჩა კანდელაკმა განაცხადა, მათ შიმშილობის შეწყვეტისა და პოლიტიკურ პროცესებში აქტიურად ჩართვის გადაწყვეტილება ერთობლივად მიიღეს.

მისი თქმით, შიმშილობა შეწყვიტეს ასევე, მწერალმა ირაკლი ლომოურმა და პატიმრობაში მყოფმა ლაშა მესხიამა.

კანდელაკის განცხადებით, ისინი სტუდენტების აქციებს შეუერთდებიან და აღნიშნული ფორმით მოითხოვენ დაპატიმრებული ლაშა მესხიასა და დავით ფაცაციას გათავისუფლებას.

იუსტიციის სახლთან ახალგაზრდები მეოთხე დღეა შიმშილობდნენ. მათთან ერთად შიმშილობდა მწერალი ირაკლი ლომოური და მისი მეგობარიც.