ცესკო-სთან შეკრებილი მედიასაშუალებების წარმომადგენლები კომისიის თავმჯდომარესთან ზურაბ ხარატიშვილთან შეხვედრას მოითხოვენ.

ამ დროისთვის აქციის მონაწილეები ცესკო-ს ფოიეში იმყოფებიან და ხარატიშვილთან შეხვედრას სხდომის დაწყებამდე ითხოვენ. ისინი სკანდირებენ - „გამოდი, გამოდი“.

ამ წუთებში ცენტრალურ საარჩევნო კომისიაში სხდომა მიმდინარეობს. პრესსამსახურის წარმომადგენელმა მათ განუცხადა, რომ შესაძლებლობა ჰქონდათ აკრედიტაციისა და პირადობის წარდგენის შემდეგ სხდომას დასწრებოდნენ, თუმცა, აღნიშნული შეთავაზება მედიასაშუალებების წარმომადგენლებმა გააპროტესტეს და განაცხადეს, რომ არა სხდომაზე დასწრება, არამედ უშუალოდ ხარატიშვილთან შეხვედრა სურთ.

ჟურნალისტები ცენტრალურ საარჩევნო კომისიასთან ცესკო-ს მიერ მიღებულ დადგენილებას აპროტესტებენ, რომლითაც საარჩევნო უბნებზე ვიდეო და ფოტოგადაღება იზღუდება. ცესკო-ს გადაწყვეტილებით, არჩევნების დღეს საარჩევნო უბნებზე ფოტო და ვიდეოგადაღება კენჭისყრის პროცესში სპეციალურად გამოყოფილი ადგილიდან იქნება შესაძლებელი. ფოტო და ვიდეოგადაღების დაწყებიდან 10 წუთის განმავლობაში გადაადგილება თავისუფალი იქნება, ხოლო 10 წუთის შემდეგ, კამერები განთავსდებიან გადასაღები ობიექტიდან, მინიმუმ, 3 მეტრის მანძილზე, სპეციალურად გამოყოფილ ადგილზე. კამერებისთვის სპეციალური ადგილი ისე უნდა იყოს გამოყოფილი, რომ საარჩევნო ყუთი ჩანდეს. საარჩევნო უბანზე სამაგიდო სიისა და ამომრჩეველთა კაბინის შიგნიდან გადაღება იკრძალება. მობილური ტელეფონით გადაღებაზე რეგულაციები არ ვრცელდება. გადაღება დაშვებულია პირველიდან ბოლო ამომრჩევლამდე და შემაჯამებელი ოქმის დამტკიცებამდე პერიოდის ჩათვლით. გარდა ამისა, თუ ოპერატორმა ერთხელ მაინც დატოვა საარჩევნო უბანი, ის გადაღების უფლებას კარგავს.