გაზეთ „რეზონანსის“ რედაქტორი ლაშა ტუღუში მიიჩნევს, რომ ცესკო-მ ეშმაკური დადგენილება მიიღო საარჩევნო უბნებში ვიდეო და ფოტოგადაღების შეზღუდვის თაობაზე.

როგორც მან ცესკო-სთან ჟურნალისტთა აქციაზე განაცხადა, აღნიშნული დადგენილების მიღება ზედმეტი იყო, რადგან კანონი ისედაც განსაზღვრავდა და არეგულირებდა მედიასაშუალებების მუშაობას საარჩევნო უბანზე.

ტუღუშის თქმით, ცესკო-ს მიერ შემუშავებული ეშმაკური მუხლები, მიმართულია იმისკენ, რომ დაიფაროს თუ როგორ ხდება არჩევნების გაყალბება.

„მაგალითად, არ შეიძლება საარჩევნო კაბინის გადაღება გარედან და შესაბამისად ვერ დაფიქსირდება, თუ როგორც შეჰყვებიან ამომრჩევლებს კაბინაში სხვადასხვა პირები. ასევე, დადგენილებაში წერია, რომ კამერა მიმართული უნდა იყოს მხოლოდ ყუთისკენ და თუ გვინდა ვიღაცეების შესვლა გამოსვლა გადავიღოთ, ეს ვერ მოხერხდება“ - აღნიშნა ტუღუშმა და დასძინა, რომ ერთადერთი გამოსავალი შექმნილი მდგომარეობიდან ისაა, რომ ცესკო-მ აღნიშნული დადგენილება გააუქმოს.

მისივე თქმით, წინააღმდეგ შემთხვევაში, არჩევნები სიბნელეში ჩატარდება.

ცესკო-ს მიერ მიღებულ დადგენილებას აპროტესტებს ჟურნალისტი შორენა შავედრაშვილიც. როგორც მან აღნიშნა, ცესკო-ს რეგულაცია ზღუდავს მედიის მუშაობას და მედიას არ ექნება შესაძლებლობა სრულფასოვნად იმუშაოს არჩევნების დღეს.

მისივე თქმით, აღნიშნული დადგენილება კაბალურ პირობებში აყენებს მედიასაშუალებებს და ის უნდა გაუქმდეს.

ცესკო-ს გადაწყვეტილებით, არჩევნების დღეს საარჩევნო უბნებზე ფოტო და ვიდეოგადაღება კენჭისყრის პროცესში სპეციალურად გამოყოფილი ადგილიდან იქნება შესაძლებელი. ფოტო და ვიდეოგადაღების დაწყებიდან 10 წუთის განმავლობაში გადაადგილება თავისუფალი იქნება, ხოლო 10 წუთის შემდეგ, კამერები განთავსდებიან გადასაღები ობიექტიდან, მინიმუმ, 3 მეტრის მანძილზე, სპეციალურად გამოყოფილ ადგილზე. კამერებისთვის სპეციალური ადგილი ისე უნდა იყოს გამოყოფილი, რომ საარჩევნო ყუთი ჩანდეს. საარჩევნო უბანზე სამაგიდო სიისა და ამომრჩეველთა კაბინის შიგნიდან გადაღება იკრძალება. მობილური ტელეფონით გადაღებაზე რეგულაციები არ ვრცელდება. გადაღება დაშვებულია პირველიდან ბოლო ამომრჩევლამდე და შემაჯამებელი ოქმის დამტკიცებამდე პერიოდის ჩათვლით. გარდა ამისა, თუ ოპერატორმა ერთხელ მაინც დატოვა საარჩევნო უბანი, ის გადაღების უფლებას კარგავს.