ახალგაზრდული ორგანიზაციების წარმომადგენელმა სტუდენტებმა იუსტიციის სახლისკენ დაგეგმილი საპროტესტო მსვლელობა გადადეს.

როგორც დაგეგმილი მსვლელობის ორგანიზატორმა, ორგანიზაცია „ივერიელების“ ხელმძღვანელმა ლევან კოჭლოშვილმა მეტროსადგურ „რუსთაველთან“ ჟურნალისტებს განუცხადა, მსვლელობის გადადების გადაწყვეტილება იმ მოტივით მიიღეს, რომ სტუდენტური ძალების დაქსაქსვა არ მოხდეს.

კოჭლოშვილი აცხადებს, რომ ისინი თბილისის სახელმწიფო უნივერსიტეტის პირველ კორპუსთან 15.00 საათზე დაგეგმილ სტუდენტების აქციას შეუერთდებიან.

„არ გვინდა დავიქსაქსოთ. ჩვენი სურვილია, ყველა სტუდენტმა ერთად ვიბრძოლოთ საერთო მიზნების მისაღწევად“ - განაცხადა კოჭლოშვილმა.

ორგანიზაციის წევრები აცხადებენ, რომ მათი მოთხოვნა კვლავ უკანონოდ დაპატიმრებული ახალგაზრდების -„ქართული ოცნების“ ახალგაზრდული ორგანიზაციის წევრების დავით ფაცაციას და ლაშა მესხიას, ასევე, უფლებადამცველი დაჩი ცაგურიას და მისი მეგობრის ბექა ალადაშვილის გათავისუფლებაა.