საქართველოს დამოუკიდებლობის დღეს - 26 მაისს საქართველოს დემოკრატიული რესპუბლიკის შეიარაღებული ძალების მთავარსარდალს, ეროვნულ გმირს, გენერალ გიორგი კვინიტაძეს სამშობლოში, მთაწმინდის მწერალთა და საზოგადო მოღვაწეთა პანთეონში სამხედრო პატივით დაკრძალავენ. ემიგრაციაში გარდაცვლილი ქართველი გენერლის სამშობლოში გადმოსვენებასთან დაკავშირებით, მისი ოჯახის წევრებმა გენერლის პირადი ნივთები საქართველოს ეროვნულ მუზეუმს გადასცეს.

მემორიალური ნივთების გამოფენა მუზეუმის გენერალურმა დირექტორმა დავით ლორთქიფანიძემ გახსნა. მოწვეულ სტუმრებს სიტყვით მიმართეს საქართველოს პრეზიდენტმა სალომე ზურაბიშვილმა, თავდაცვის მინისტრმა ჯუანშერ ბურჭულაძემ და გენერლის შვილიშვილებმა - ნოდარ და მერაბ ოდიშელიძეებმა. სიტყვით გამომსვლელებმა გენერალ კვინიტაძის ცხოვრებასა და მოღვაწეობაზე ისაუბრეს, ასევე აღნიშნეს მისი პიროვნების ღვაწლი ქვეყნისა და თავდაცვის ძალების წინაშე.

პრეზიდენტმა სალომე ზურაბიშვილმა ეროვნულ მუზეუმს მის კოლექციაში არსებული ოჯახის წევრების პასპორტი გადასცა. მან გამოთქვა სურვილი, რომ, სამომავლოდ, ოკუპაციისა და ემიგრაციის მუზეუმები გაერთიანდეს, რადგან ორივე მუზეუმი ოკუპაციის პერიოდს ასახავს.

გამოფენას თავდაცვის ძალების წარმომადგენლები და გენერლის ოჯახის წევრები დაესწრნენ. გენერალ კვინიტაძის ხელნაწერები, იარაღ-საჭურველი, რუკა, პორტრეტი და სხვა მემუარული ნივთები ეროვნული მუზეუმის ფოიეში ერთ თვის განმავლობაში იქნება გამოფენილი.

მომავალში კი, აღნიშნული ექსპოზიცია ოკუპაციის მუზეუმში დაიდებს ბინას.

ეროვნული გმირის, გენერალ გიორგი კვინიტაძის საქართველოში ჩამოსვენების თემაზე მუშაობა პრემიერ-მინისტრ ირაკლი ღარიბაშვილის თავდაცვის მინისტრობის დროს დაიწყო და მისი ძალისხმევით დამოუკიდებელი საქართველოსთვის მებრძოლ გენერალს მშობლიურ მიწას ქვეყნის დამოუკიდებლობის დღეს მიაბარებენ.