იუსტიციის სახლის მიმდებარე ტერიტორიიდან აქციის მონაწილეები ისევ ფილარმონიის შენობისკენ მიემართებიან.

ტერიტორია აქციის მონაწილეთა დიდმა ნაწილმა მას შემდეგ დატოვა, რაც იუსტიციის სახლში შესვლის საშუალება მათ პოლიციამ არ მისცა და ფიზიკური დაპირისპირება მოხდა.

ერთ-ერთი მოქალაქის რუსუდან ჯოჯუას თქმით, სამართალდამცავებსა და აქციის მონაწილეებს შორის შეხლა-შემოხლის დროს მან დაინახა, როგორ ჩასვეს სამართალდამცავებმა ორი ახალგაზრდა მანქანაში და წაიყვანეს.

„ორი ახალგაზრდა ეზოში მიიმწყვდიეს, პოლიციის მანქანაში ჩასვეს და წაიყვანეს“ - აცხადებს ჯოჯუა.

შემთხვევის ადგილზე იმყოფებოდნენ ირაკლი და ნინია კაკაბაძეები.

„გვინდოდა იუსტიციის სახლთან მშვიდად პლაკატებით დავმდგარიყავით და ჩვენი პოზიცია დაგვეფიქსირებინა, თუმცა, პატრულმა ამის საშუალება არ მოგვცა. რამდენიმე ახალგაზრდა, რომელთაც იუსტიციის სახლთან მიახლოება მოახერხეს, ძალიან უხეში ფორმებით უკან დააბრუნეს. რამდენიმე მათგანს, ვინც ახალგაზრდები ძალით გამოიყვანა, პოლიციის ფორმა არ ეცვა“ - აღნიშნა ნინია კაკაბაძემ.

პოლიციასა და აქციის მონაწილეებს შორის ფიზიკური დაპირისპირება მას შემდეგ დაიწყო, რაც აქციის მონაწილეებმა იუსტიციის სახლის ტერიტორიაზე შესვლა სცადეს. თბილისის იუსტიციის სახლი დღეს პრეზიდენტმა გახსნა.