ფილარმონიიდან მთავრობის კანცელარიისკენ მსვლელობით მიმავალი აქციის მონაწილეები, რუსთაველის გამზირზე „ნაციონალური მოძრაობის“ მაჟორიტარი დეპუტატობის კანდიდატის არჩილ გეგენავას საარჩევნო შტაბთან რამდენიმე წუთით შეჩერდნენ.

აქციის მონაწილეები სკანდირებენ სიტყვებს - „სირცხვილია“ და „წადი“. ამასთან, მათ 15 კაციანი ჯგუფი გამოეყო, რომლებმაც ოფისის შესასვლელთან ცოცხალი ჯაჭვი შეკრეს.

აქციის ერთ-ერთი ორგანიზატორის უფლებადამცველ დაჩი ცაგურიას თქმით, ცოცხალი ჯაჭვის შეკვრა იმისთვის გახდა საჭირო, რომ ოფისის თანამშრომლებსა და აქციის მონაწილეებს შორის, არანაირი კონტაქტი არ ყოფილიყო და ყველანაირი პროვოკაციისგან თავი აერიდებინათ.

აქციის მონაწილეები ამ დროისთვის, ისევ დაიძრნენ და სახელმწიფო კანცელარიისკენ მიემართებიან. რუსთაველის გამზირზე სატრანსპორტო მოძრაობა შეზღუდულია. აქციის რამდენიმე მონაწილეს კანცელარიასთან სიმბოლურად ცოცხები მიაქვს. პატიმრების წამების დამადასტურებელ კადრებში, რომლებიც ტელევიზიებით გავრცელდა, ცოცხი ფიგურირებს, როგორ პატიმრების შეურაცხოფის ერთ-ერთი საშუალება.