თსუ-ს რექტორი ალექსანდრე კვიტაშვილი სტუდენტების ბრალდებებს უნივერსიტეტიდან პოლიტკური ნიშნით ლექტორების გათავისუფლების შესახებ, კატეგორიულად უარყოფს.  ამის შესახებ ჟურნალისტებს სანდრო კვიტაშვილმა უნივერსიტეტში სტუდენტების აქციისა და მათი მოთხოვნების კომენტირებისას განუცხადა.

სტუდენტების მოთხოვნა, სწავლის საფასურის შემცირებასთან და სხვა ტექნიკური საკითხების მოგვარებასთან ერთად, უნივერსიტეტიდან პროფესორ-მასწავლებლების დათხოვნის შეწყვეტაა.

კვიტაშვილის განმარტებით, იმ თანამშრომლებს, რომელთა პოლიტიკური ნიშნით გათავისუფლებაში მას ადანაშაულებენ, უბრალოდ შრომითი ხელშეკრულების ვადა გაუვიდათ.

ამასთან, უნივერსიტეტის რექტორი აქციის მონაწილე სტუდენტების მოთხოვნის გარკვეულ ნაწილს სამართლიანად მიიჩნევს. თუმცა, მისი თქმით, სტუდენტების ზოგიერთი მოთხოვნა უნივერსიტეტის პრეროგატივას არ უკავშირდება და სწორედ, ამიტომ ვერ სრულდება.

კვიტაშვილის განცხადებით, ბაზების პრობლემა მართლაც არსებობს უნივერსიტეტში, მაგრამ ამ საკითხზე მუშაობა მიმდინარეობს და მისი მოგვარება დროს მოითხოვს. უნივერსიტეტში შეიცვალა IT პროგრამის სამსახურიც.

„რაც შეეხება რეგენტთა საბჭოს გაუქმების მოთხოვნას, ეს არ არის უნივერსიტეტის პრეროგატივა და ამისთვის საჭიროა კანონში ცვლილებების შეტანა“ - განაცხადა კვიტაშვილმა და დასძინა, რომ ის მზადაა სტუდენტებს ნებისმიერ შეკითხვაზე ამომწურავი პასუხი გასცეს.

სტუდენტთა ნაწილმა დღეს სხვადასხვა მოთხოვნებით უნივერისტეტში ხმაურიანი აქცია გამართა. მათ კითხვები აქვთ იმის შესახებ, თუ რატომ ვერ ირჩევენ საგნებს, რისთვის არის აუცილებელი უნივერსიტეტში რეგენტთა საბჭო, რატომ ხდება უნივერსიტეტში თანამშრომლების პოლიტიკური ნიშნით გათავისუფლება და სხვა.