კოალიცია „ქართული ოცნების“ ლიდერი ბიძინა ივანიშვილი დღეს თელავში გამართულ აქციაზე მოსახლეობას ქუთაისში ტექნოლოგიური უნივერსიტეტის დაარსებასა და საუნივერსიტეტო ქალაქის აშენებას დაპირდა.

როგორც მან აქციაზე განაცხადა, აღნიშნული საკითხით პოლიტიკაში მოსვლამდეც იყო დაინტერესებული და მომზადებული ჰქონდა რამდენიმე პროექტიც.

„მიუხედავად იმისა, რომ დატვირთული საარჩევნო რეჟიმი მაქვს, მე დავიწყე ამ დაპირების შესრულება. სპეციალურად შევარჩიე სასოფლო-სამეურნეო გამოცდილებით და პროგრესული მიღწევებით ცნობილი ინდიანას შტატი და ველაპარაკე მის გუბერნატორს - მიჩ დანიელს“- განაცხადა ივანიშვილმა და აღნიშნა, რომ ამ შტატში ერთ-ერთი უდიდესი უნივერსიტეტია, რომელსაც 13 ნობელიანტი კურსდამთავრებული ჰყავს.

მისივე ცნობით, გუბერნატორთან შეთანხმებით, ინდიანაში გამოცდილების გაზიარებისა და თანამშრომლობისთვის ჯგუფი გაგზავნა.

ივანიშვილის განმარტებით, 12-14 სექტემბერს საქართველოში საერთაშორისო კონფერენცია გაიმართება, რომელშიც მონაწილეობას ინდიანას ორი უდიდესი უნივერსიტეტის წარმომადგენლები მიიღებენ.

მისივე ცნობით, კონფერენციაზე საქართველოსთვის საჭირბოროტო საკითხებს განიხილავენ. დისკუსიები გაიმართება და მოხსენებები მიეძღვნება საუნივერსიტეტო და პროფესიულ სწავლებას; თანამედროვე აგროტექნიკითა და ახალი სანერგე და სათესლე მასალებით ქვეყნის მომარაგებას და სხვა თემებს.

„აქამდე რა ტექნიკაც შემოდიოდა ჩვენს ქვეყანაში უმეტესად გამოუსადეგარია, რადგან არ ესადაგება ჩვენს სპეციფიკას, გრუნტსა და რელიეფს. ამიტომ, ჩვენ საქმიანი კავშირი უკვე დავამყარეთ სასოფლო-სამეურნეო ტექნიკის უცხოელ მწარმოებლებთან და არჩევნებში გამარჯვების შემდეგ დაუყოვნებლივ დავიწყებთ თქვენთვის ისეთი და იმ რაოდენობით ტექნიკის შემოტანას, რომელიც საქართველოში სჭირდება მეურნე კაცს“- აღნიშნა ივანიშვილმა.

მისივე თქმით, ხელისუფლება, როგორც სჩვევია, ამ საქმესაც ზერელედ ეკიდება, იმიტომაც ჰიბრიდული სიმინდი შემოიტანა და გლეხებს იძულებით დაათესინა.

„როგორ იზარალა ამით გლეხმაც და ქვეყანამაც, ჩემზე კარგად თქვენ იცით. მე გპირდებით, რომ ჩვენ გულდასმით შევისწავლით ყოველი რეგიონის საჭიროებას. ყველა რეგიონში დავრგავთ და გამოვცდით ახალ ნერგებსა და ჯიშებს. ჩვენ ეს საქმე 3 წლია დაწყებული გვაქვს, ამიტომაც შევქმენით წილკნისა და ჯიღაურას სანერგე მეურნეობები. ახლა ამ გამოცდილებას მთელ ქვეყანაში დავნერგავთ, ყველაფერს ჩვენს გლეხკაცს შევუთანხმებთ და მხოლოდ ასე მივიღებთ გადაწყვეტილებას“-აღნიშნა ივანიშვილმა.