ერთიანი ეროვნული გამოცდების, საერთო სამაგისტრო გამოცდებისა და სტუდენტთა საგრანტო კონკურსის ჩატარების თარიღებისა და წესის შესახებ გამართულ პრესკონფერენციაზე დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალურმა დირექტორმა ამირან გამყრელიძემ პანდემიის პირობებში 2020 წლის ერთიანი ეროვნული გამოცდების ჩატარებასთან დაკავშირებით დამტკიცებული პროტოკოლის რამდენიმე პუნქტი განმარტა.

ამირან გამყრელიძემ აღნიშნა, რომ იცვლება მიდგომა ერთიანი ეროვნული გამოცდების ჩატარების პროცესთან დაკავშირებით, რათა ამ დროს თავშეყრილმა ადამიანთა დიდმა მასამ არ შექმნას ქვეყანაში კოვიდინფექციის გავრცელების მომატებული რისკი. მისი თმით, ყველაფერი გაკეთდება იმისთვის, რომ ერთიან ეროვნულ გამოცდაზე არ მოხვდეს ინფიცირებული აბიტურიენტი, რომელიც შემდგომში, შესაძლოა, ინფექციის მასობრივი გავრცელების წყარო გახდეს.

ამირან გამყრელიძემ განმარტა, თუკი აბიტურიენტს გამოცდებამდე გამოუვლინდება კოვიდინფექციის მთავარი სიმპტომები: ტემპერატურის მომატება, ხველა, სუნთქვის უკმარისობა, ცემინება, უნდა მიმართოს ოჯახის ექიმს და მისი რჩევით შემდგომ ჩაუტარდება ლაბორატორიული კვლევები. თუკი აბიტურიენტს კოვიდვირუსი დაუდასტურდა, ის არ დაიშვება გამოცდაზე.

იმ შემთხვევაში, თუ აბიტურიენტს დიაგნოსტიკის პროცედურები წინასწარ აქვს ჩატარებული და კოვიდზე პასუხი უარყოფითია, იგი დაიშვება გამოცდაზე, მიუხედავად სიმპტომებისა. პროტოკოლის შესაბამისად, იგი გამოცდას დაწერს იზოლირებულ ოთახში, შესაბამისი ბარიერებით გამოყოფილ სივრცეში. ამირან გამყრელიძის თქმით, პროტოკოლში გაწერილია სხვადასხვა ვარიანტი, როგორ უნდა მოიქცეს შეფასებისა და გამოცდების ეროვნული ცენტრი ცალკეული სიმპტომების არსებობის შემთხვევაში.
გარდა ამისა, თუკი აბიტურიენტი მცირე სიმპტომებით დაუშვეს პირველ გამოცდაზე, რადგან ლაბორატორიული კვლევით მას კოვიდინფექცია არ დაუდასტურდა, მეორე გამოცდისთვის იგი უნდა გავიდეს ხელახალ დიაგნოსტიკაზე.

ამირან გამყრელიძემ საგანგებოდ გაუსვა ხაზი, რომ სახელმწიფო და დაავადებათა ეროვნული ცენტრი აბიტურიენტებისათვის დიაგნოსტიკური კვლევის ჩატარებას ყოველგვარი გადასახადის გარეშე, უფასოდ უზრუნველყოფს, ასევე უფასო იქნება დიაგნოსტიკა განმეორებითი კვლევის შემთხვევაში. დღევანდელი მონაცემებით, სახელმწიფოს აქვს 17 ლაბორატორია, სადაც PCR ტესტირების ჩატარება არის შესაძლებელი. ეროვნული გამოცდების დაწყებისთვის მათი რიცხვი 20-22-ს მიაღწევს. აბიტურიენტებს შესაძლებლობა აქვთ დიაგნოსტირებისათვის მიმართოთ ლაბორატორიებს სხვადასხვა ქალაქებში: თბილისში, ბათუმში, ქუთაისსა და ოზურგეთში.
მშობლებისა და აბიტურიენტებისთვის გაკეთდა იმის განმარტებაც, რომ გამოცდა სტრესია და შესაძლებელია სიცხის მომატება ამითაც იყოს განპირობებული. როდესაც თერმოსკრინინგი ტარდება ელექტრონული, დისტანციური თერმომეტრებით, ტემპერატურის მაჩვენებელი, შესაძლოა, არ იყოს ზუსტი. შეფასებისა და გამოცდების ცენტრს მიეცა რეკომენდაცია, თუკი აბიტურიენტს გამოცდაზე შესვლისას თერმოსკრინინის დროს აღენიშნება ტემპერატურა, მას ეძლევა დრო ჩვეულებრივი, კლასიკური ვერცხლისწყლის თერმომეტრით გადაიმოწმოს ტემპერატურა.

ამირან გამყრელიძის თქმით, არ დაიშვება გამოცდაზე ის აბიტურიენტი, რომელსაც, ტემპერატურის გარდა, სხვა სიმპტომებიც ექნება და წინასწარ არ მიმართავს ოჯახის ექიმს დიაგნოსტიკისთვის.