არასამთავრობო ორგანიზაცია „საქართველოს ახალგაზრდა მწვანეები“ გარემოს დაცვისა და ბუნებრივი რესურსების სამინისტროს მიერ ორგანიზებული საერთაშორისო კონფერენცია „თბილისი +35“ -ს არასერიოზულად მიიჩნევს.

ორგანიზაციაში აცხადებენ, რომ კონფერენცია „თბილისი +35“ მთავრობის მიერ ბიუჯეტის უმიზნოდ ხარჯვის კიდევ ერთ დემონსტრირებას წარმოადგენს.

აღნიშნულთან დაკავშირებით, „საქართველოს ახალგაზრდა მწვანეები“ განცხადებას ავრცელებს, რომელშიც ნათქვამია, რომ ქვეყანაში აშკარაა გარემოს დაცვით საკითხებთან დაკავშირებით ცნობიერების გაზრდის აუცილებლობა, რაც ხანგრძლივი პროცესია და არასამთავრობო და სამთავრობო სექტორების ერთობლივ ძალისხმევას მოითხოვს, თუმცა, გარემოს დაცვისა და ბუნებრივი რესურსების სამინისტრომ ქვეყნის გარემოსდაცვით კანონმდებლობაზე მუშაობის პრეროგატივა ეკონომიკისა და მდგრადი განვითარების სამინისტროს მიანდო.

ორგანიზაციაში აცხადებენ, ბოლო ერთი წლის განმავლობაში ქვეყანამ იჯარით გასხვისებული მწვანე საფარი, რეკრეაციული ზონის სტატუსის მქონე ტერიტორიებზე აშენებული შენობა-ნაგებობები, საქართველოს მთავრობის მიერ ინიცირებული კანონპროექტი “საქართველოს ზოგიერთ საკანონმდებლო აქტში ცვლილებების შეტანის თაობაზე” მიიღო.

„ახალგაზრდა მწვანეები“ აცხადებენ, რომ კონფერენციაზე - „თბილისი +35“ დამსწრე საერთაშორისო დელეგაციებმა, მათ შორის UNESCO-სა და UNEP-ის წარმომადგენლებმა ზეწოლა უნდა მოახდინონ საქართველოს მთავრობაზე, რათა ქვეყანაში არსებული გარემოსდაცვითი პოლიტიკა დაიხვეწოს.