საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა სამსახურებრივი მოვალეობის კეთილსინდისიერად შესრულებისთვის წლის შემაჯამებელ შეხვედრაზე, მანდატურის სამსახურის 60 თანამშრომელი მადლობის სიგელებით დააჯილდოვა.

სიტყვით გამოსვლისას, მიხეილ ჩხენკელმა ყველა სახის ძალადობისადმი შეუწყნარებელ, უსაფრთხო სასწავლო გარემოს ფორმირებისკენ გადადგმულ ნაბიჯებზე ისაუბრა და აღნიშნა, რომ მხოლოდ მზრუნველ გარემოში ეძლევა მოზარდს შესაძლებლობა სრულად გამოავლინოს პოტენციალი, აღიზარდოს აქტიურ მოქალაქედ და მონაწილეობა მიიღოს ქვეყნის განვითარებაში. ამ თვალსაზრისით კი მანდატურის სამსახურს პედაგოგებთან, ფსიქოლოგებსა და სოციალურ მუშაკებთან ერთად, უმნიშვნელოვანესი როლი აკისრია.

"მანდატურის სამსახური ჩვენი სისტემის ერთ-ერთი ყველაზე მნიშვნელოვანი მიმართულება გახლავთ, რადგან შეუძლებელია საუბარი განათლების ხარისხის განვითარებაზე, ახალ აკადემიურ პროგრამებზე, ინიციატივებზე და, ზოგადად, ახალი სკოლის მოდელზე, თუკი სკოლებში ბავშვებისთვის არ იქნება შექმნილი უსაფრთხო გარემო. ეს არის უმთავრესი და აუცილებელი პირობა იმისა, რომ ჩვენი ჩანაფიქრი, აკადემიური განვითარების მიმართულებით, რეალურად განხორციელდეს სკოლებში.

მინდა მადლობა გადაგიხადოთ მანდატურის სამსახურის ასეთი დიდი პროგრესისთვის. მიუხედავად იმისა, რომ გამოწვევებიც საკმაოდ ბევრია, დარწმუნებული ვარ, თქვენი პროფესიონალიზმისა და, რაც მთავარია, დამოკიდებულების მეშვეობით სკოლებში არსებული გამოწვევები და პრობლემები აუცილებლად გადაიჭრება.

ყველაზე მთავარი აღნიშნულ პროფესიაში არის ბავშვების მიმართ დამოკიდებულება, მოსწავლეების სიყვარული და მათთვის მზრუნველი ატმოსფეროს შექმნა, რადგან ამის გარეშე ისეთი პრობლემების საფუძვლიანი მოგვარება, როგორიცაა ბულინგის პრევენცია და მასთან დაკავშირებული სხვა მნიშვნელოვანი გამოწვევები, შეუძლებელია.

ბავშვების სკოლაში ყოფნისას თქვენ ასრულებთ მშობლის როლს, რადგან თქვენ ყველაზე მთავარს - ბავშვის უსაფრთხოებას იცავთ." - განაცხადა მინისტრმა და გაწეული ძალისხმევისთვის, ყველა თანამშრომელს მადლობა გადაუხადა.

მინისტრმა ვრცლად ისაუბრა მანდატურის სამსახურის რეფორმის ფარგლებში მიღწეულ შედეგებზე და ხაზი გაუსვა, რომ სასურველი ვითარების მისაღწევად ჯერ კიდევ ბევრი სამუშაოა ჩასატარებელი.

მიხეილ ჩხენკელის თქმით, მომავალი წლიდან მანდატურის სამსახური, ევროპელ ექსპერტებთან მჭიდრო თანამშრომლობით, სასკოლო მედიაციის მექანიზმის დანერგვას დაიწყებს. სრული დატვირთვით ამოქმედდება ახალი ინტერნეტ-პორტალი ბეფრიენდ.მეს.გოვ.გე, რომელიც მნიშვნელოვნად შეუწყობს ხელს ძალადობის შესახებ საზოგადოების ცნობიერების ამაღლებასა და ინფორმაციის ხელმისაწვდომობას. გაგრძელდება როგორც მოქმედი მანდატურების გადამზადება, ასევე გაფართოების პროცესი. 2020 წელს მანდატურის სამსახური, დამატებით 130 საჯარო სკოლაში შევა.