ეროვნული უმცირესობებით კომპაქტურად დასახლებული რეგიონების სკოლამდელ და ზოგადსაგანმანათლებლო დაწესებულებებში ბილინგვური განათლებისა და უმცირესობათა მშობლიური ენების სწავლა-სწავლების გაუმჯობესების მიზნით, საქართველოს განათლების, მეცნიერების, კულტურისა და სპორტის მინისტრის მოადგილემ ეკატერინე დგებუაძემ სამოქალაქო საზოგადოებისა და საერთაშორისო ორგანიზაციების წარმომადგენლებთან სამუშაო შეხვედრა გამართა.

შეხვედრაზე წარადგინეს უმცირესობათა მშობლიური ენების სწავლა-სწავლების გაუმჯობესების კონცეფცია, ასევე იმსჯელეს ამ მიმართულებით არსებულ პრობლემებზე, გამოწვევებსა და ამ გამოწვევების დაძლევის გზებზე.

ერთიანი პოლიტიკის გასატარებლად, შეხვედრის დასასრულს, მხარეები შეთანხმდნენ სისტემურ მიდგომებზე, რაც მოითხოვს ამ პროცესებში ჩართული ყველა უწყებისა თუ ორგანიზიციის კოორდინირებულ, ურთიერთშეთანხმებულ ქმედებებს.
საზოგადოებრივ ცხოვრებაში ეროვნულ უმცირესობათა ინტეგრაცია სახელმწიფოს ერთ-ერთი უმნიშვნელოვანესი გამოწვევაა. ინტეგრაციის ეფექტურ წარმართვაში გადამწყვეტ როლს განათლების სისტემა ასრულებს, რომელმაც უნდა უზრუნველყოს როგორც ეროვნულ უმცირესობათა ენობრივ-კულტურული იდენტობის დაცვა, ასევე სახელმწიფო ენის სათანადოდ ცოდნა, რაც ეროვნულ უმცირესობათა საზოგადოებრივი ინტეგრაციის წარმატების ერთ-ერთი მნიშვნელოვანი ინდიკატორია.

ამ ორი მიზნის მიღწევის ოპტიმალური გზა არაქართულენოვან სკოლებსა თუ სექტორებში სწორედ ბილინგვური განათლების დანერგვაა. ბილინგვური განათლება ხელს უწყობს ორენოვანი წიგნიერების განვითარებას, რაც ეროვნულ უმცირესობათა სრულფასოვანი სამოქალაქო ინტეგრაციის აუცილებელი საფუძველია.