საქართველოს განათლების, მეცნიერების, კულტურისა და სპორტის მინისტრის პირველმა მოადგილემ, ირინა აბულაძემ, რომელიც ბრიუსელში, აღმოსავლეთ პარტნიორობის განათლების მინისტერიალში მონაწილეობს, განათლების კომპლექსური რეფორმის ფარგლებში გაწეული მხარდაჭერისთვისა და ნდობისთვის ევროკავშირის წარმომადგენლებს მადლობა გადაუხადა და იმ სიახლეებზე ისაუბრა, რომელიც საქართველოს განათლების სისტემაში უკანასკნელ პერიოდში განხორციელდა.

მინისტერიალზე, რომელსაც ფინეთის განათლების მინისტრი ჰანა კოსონენი ხელმძღვანელობდა და რომელსაც აღმოსავლეთ პარტნიორობის ქვეყნებისა და აღმოსავლეთ ევროპის განათლების მაღალი თანამდებობის პირები ესწრებოდნენ, მთავარ თემას სწავლა-სწავლების სფეროში განხორციელებული და დაგეგმილი რეფორმები წარმოადგენდა.

მნიშვნელოვანია, რომ ევროკავშირის წარმომადგენლებმა საქართველოს განათლების სისტემის მიმართ უკანასკნელ პერიოდში უპრეცენდენტოდ მაღალი ნდობა დააფიქსირეს. ეს გამოიხატა როგორც საქართველოში ევროკავშირის ხელშეწყობით "ევროპული სკოლის" პროექტის დაწყებაში, ასევე Erasmus + პროგრამაში დამატებით 6 მლნ ევროს დამატებაში (რაც დამატებით 800 მდე სტუდენტის სასტიპენდიო პროგრამაში ჩართვას გულისხმობს), უმაღლესი განათლების სისტემის Enqa-ში, Eqar-სა და ევროკავშირის სამეცნიერო პორტალ Euraxxess ში გაწევრიანებაში.

შეხვედრაზე საქართველოს მხარემ დააყენა ინიციატივა გაიზარდოს Erasmus-ის პროგრამაში სტუდენტების სასტიპენდიო ადგილების რაოდენობა. ამასთან, Erasmus-ის გაცვლითი პროგრამებით სარგებლობის შესაძლებლობა პროფესიული განათლების საფეხურის სტუდენტებსა და მასწავლებლებსაც მიეცეთ.