ვაკის გამგეობის ინფრასტრუქტურული პროექტების ფარგლებში, წყნეთში სხვადასხვა საგზაო სამუშაოებთან ერთად, რუსთაველის ქუჩაზე მდებარე დასასვენებელი სივრცის განახლება მიმდინარეობს.

თბილისის მერიის პრესსამსახურის ინფორმაციით, მაია წყნეთელის ძეგლთან საბავშვო-გასართობი მოედანი მოეწყობა, რომელზეც სხვადასხვა ატრაქციონი განთავსდება, სივრცეში მოსასვენებელი პავილიონი დამონტაჟდება, ასევე საპარკე სკამები და სხვა ურბანული ავეჯი. გარდა ამისა, ტერიტორია გამწვანდება, განათდება, მოეწყობა სარწყავი სისტემა და ფეხით სავალი ბილიკები.

მიმდინარე სარეაბილიტაციო სამუშაოებს ვაკის რაიონის გამგებელი ნოდარ ტურძელაძე გაეცნო.

„ძალიან მნიშვნელოვანია წყნეთში განხორციელებული თითოეული პროექტი. მიმდინარე წელს, ინფრასტრუქტურის განახლებას განვაგრძობთ, მათ შორის, დასასვენებელი სივრცეების მოწყობას. ამჯერად, წყნეთის ცენტრში, რუსთაველის ქუჩაზე მდებარე სკვერის რეაბილიტაცია ხორციელდება, სადაც უამრავი ადამიანი იყრის თავს. 800 კვ.მ ფართობის ტერიტორიაზე საბავშვო ზონა და დასასვენებელი სივრცეები მშობლებისთვის მოეწყობა, სკვერი კეთილმოწყობილი, განათებული და განახლებული იქნება“, - განაცხადა ვაკის გამგებელმა.

სარეაბილიტაციო სამუშაოებს ვაკის გამგეობის დაკვეთით, კომპანია „ჯეო პარკი“ აწარმოებს.

ვაკის რაიონის მასშტაბით, ამ დროისთვის, დასასვენებელი სივრცის მოწყობა სამ მისამართზე მიმდინარეობს.