დაავადებათა კონტროლისა და საზოგადოებრივი ჯანმრთელობის ეროვნულ ცენტრში ძუძუს კიბოსთან ბრძოლის საერთაშორისო თვესთან, “ვარდისფერ ოქტომბერთან“ დაკავშირებით, კიბოს სკრინინგის საკომუნიკაციო კამპანიის ფარგლებში, ერონულისკრინინგ ცენტრთან თანამშრომლობით საკომუნიკაციო და სკრინინგ აქცია გაიმართა.

ღონისძიების მიზანია, ძუძუს კიბოს პრობლემასთან დაკავშირებით საზოგადოების ცნობიერებისა და ქალთა ინფორმირებულობის დონის ამაღლება.

ღონისძიების ფარგლებში, დაავადებათა კონტროლის ეროვნული ცენტრის ტერიტორიაზე განთავსდა მამომობილი, სადაც ეროვნული სკრინინგ ცენტრის წარმომადგენლებმა ძუძუს უფასო გამოკვლევები ჩაატარეს. ცენტრის ტერიტორიაზე ძუძუს კიბოსთან ბრძოლის თემატიკაზე "ზუმბა ფიტნეს ცენტრმა" პერფომანსიც გამართა.

"პირველ რიგში, მინდა მადლობა გადავუხადო კიბოს წინააღმდეგ საკომუნიკაციო კამპანიის წევრებს, დაავადებათა კონტროლისა და საზოგადოებრივი ჯანმრთელობის ეროვნულ ცენტრს, პირადად ბატონ ამირან გამყრელიძეს აღნიშნული ინიციატივისთვის და ასევე, "ზუმბა ფიტნეს" ცენტრს მხარდაჭერისთვის, რომელთაც სოციალური პასუხისმგებლობის ფარგლებში გამოთქვეს სურვილი ჩართულიყვნენ აღნიშნულ კამპანიაში. დღეს სწორედ ასეთი მოქალაქეობრივი პასუხისმგებლობის მაგალითები გვჭირდება, რადგან ჩვენ ყველა შესაძლებლობას ვიყენებთ, რომ ერთის მხრივ დავარწმუნოთ მოქალაქეები ადრეული დიაგნოსტიკისა და სკრინინგის ჩატარების მნიშვნელობაში და მეორეს მხრივ უზრუნველვყოთ სამედიცინო მომსახურების მაღალი ხარისხი“, - განაცხადა ეთერ კიღურაძემ ღონისძიებაზე.

თავის მხრივ, დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალურმა დირექტორმა ამირან გამყრელიძემ თავის გამოსვლაში სკრინინგული პროგრამების პოპულარიზაციის საქმეში საზოგადოების ყველა სფეროს სოციალურ პასუხისმგებლობაზე გაამახვილა ყურადღება, ამ მიმართულებით თანამშრომლობის პერსპექტივები განიხილა და კიბოს სკრინინგის საინფორმაციო კამპანიის წარმოებაში მხარდაჭერა აღუთქვა.