საქართველოს განათლების, მეცნიერების, კულტურისა და სპორტის მინისტრი მიხეილ ბატიაშვილი, „შოთა რუსთაველის საქართველოს ეროვნული სამეცნიერო ფონდის“ გენერალურ დირექტორთან, ზვიად გაბისონიასთან ერთად, აგრძელებს აკადემიური და სამეცნიერო წრეების წარმომადგენლებთან შეხვედრებს და მათ პირადად აცნობს იმ რეალურ პერსპექტივებს, რაც ქართულ სამეცნიერო წრეებს ერთიან ევროპულ სივრცეში გაწევრიანებით გაუჩნდება.

„ჩვენი ამოცანაა ყველა უნივერსიტეტში, ყველა პროფესორს, გავაგებინოთ რა შესაძლებლობები არსებობს ევროპულ სივრცეში სამეცნიერო კუთხით და დავეხმაროთ ამ შესაძლებლობების გამოყენებაში. ეს პროცესი გაგრძელდება, არ იქნება ერთჯერადი და ყველას მივაწვდით ინფორმაციას, როგორ მიიღოს ის ბენეფიტი, რასაც წევრობა გულისხმობს,“-აცხადებს მინისტრი.

შოთა რუსთაველის საქართველოს ეროვნული სამეცნიერო ფონდის გენერალურმა დირექტორმა, ზვიად გაბისონიამ, იმედი გამოთქვა, რომ ქართველი მეცნიერები აქტიურად გამოიყენებენ იმ შესაძლებლობებს რაც მათ საქართველოს EURAXESS-ში გაწევრიანებით გაუჩნდათ.

„დღეს ძალიან მნიშვნელოვანი შეხვედრა გვქონდა თელავის უნივერსიტეტის მკვლევარებთან, უნდა ითქვას, რომ საგრანტო პროექტებში ერთ-ერთი გამორჩეული უნივერსიტეტია, აქვთ ბევრი წარმატებული პროექტი, როგორც რეალიზებული ასევე მოქმედი. ჩვენ გავაცანით მკვლევარებს EURAXESS-ში გაწევრიანების პროცედურები და იმედს გამოვთქვამთ, რომ ისინი აქტიურად გამოიყენებენ ამ უნიკალურ შესაძლებლობას,“- განაცხადა ზვიად გაბისონიამ შეხვედრისას.

EURAXESS-ში საქართველოს გაწევრიანებას დადებითად აფასებს თელავის სახელმწიფო უნივერსიტეტის რექტორი, ირმა შაოშვილი :ძალიან მოხარული ვარ, რომ უშუალოდ პირველმა პირებმა გააცნეს თელავის სახელმწიფო უნივერსიტეტის პროფესორებს ბოლო პერიოდის უმნიშვნელოვანესი სიახლეები. თამამად შეიძლება ითქვას, რომ ის სიკეთე რაც მივიღეთ ქართველმა მკვლევარებმა არის სერიოზული მონაპოვარი და გულისხმობს პირდაპირ წვდომას სამეცნიერო ბაზებსა და კვლევით პროექტებზე. ვფიქრობ, ამას რეგიონული უნივერსიტეტებისთვის ძალიან დიდი მნიშვნელობა აქვს.

ევროკავშირის კვლევებისა და ინოვაციების სახელმწიფოთაშორისი ორგანიზაცია EURAXESS-ში საქართველოს ინტეგრაციასთან დაკავშირებით, პრეზენტაცია თემაზე - „საქართველოს მეცნიერების ევროპულ სივრცეში ინტეგრირების ახალი ეტაპი - ახალი შესაძლებლობები მეცნიერებისთვის” ამჯერად რეგიონის, კერძოდ, თელავის სახელმწიფო უნივერსიტეტის მეცნიერებთან და პროფესორ-მასწავლებლებთან გაიმართა.