საქართველოს განათლების, მეცნიერების, კულტურისა და სპორტის მინისტრი ირინა აბულაძე უმნიშვნელოვანესს უწოდებს ოკუპირებულ ტერიტორიებზე მცხოვრები აბიტურიენტებისთვის ამოქმედებულ პროგრამას, რაც მათ საშუალებას აძლევთ, უმაღლეს საგანმანათლებლო სასწავლებლებში სწავლების უფლება მოიპოვონ.


„ეს გადაწყვეტილება კიდევ ერთი შესაძლებლობაა ოკუპირებულ ტერიტორიებზე მცხოვრები აბიტურიენტებისთვის, მოიპოვონ უმაღლეს საგანმანათლებლო სასწავლებლებში სწავლების უფლება. ამ ეტაპზე 139-მა აბიტურიენტმა დაასრულა სკოლისშემდგომი უმაღლესი განათლების ხელშეწყობის პროგრამა, რომელიც თსუ-სა და ზუგდიდის უნივერსიტეტის ბაზაზე ხორციელდებოდა. ამ ეტაპზე მიმდინარეობს განაცხადების მიღება, თუ რომელ უნივერსიტეტებში სურთ სწავლის გაგრძელება და უახლოეს დღეებში მინისტრის ბრძანებით დამტკიცდება შესაბამისი ნუსხა, რის საფუძველზეც ისინი სასურველ უმაღლეს საგანმანათლებლო დაწესებულებებში ჩაირიცხებიან. ასევე, აგვისტოს ბოლომდე ინიცირდება მთავრობის დადგენილება მათი სახელმწიფო გრანტით სწავლის დაფინანსების თაობაზე. უახლოეს მომავალშივე, როგორც ეს უკვე განვაცხადეთ, საქართველოს პარლამენტში შევა უმაღლესი განათლების შესახებ კანონში ცვლილება წლევანდელი აბიტურიენტების პირობით ჩარიცხვის შესახებ, რომელთაც ე.წ ენგურის გამშვები პუნქტის ჩაკეტვის გამო ერთიან ეროვნულ გამოცდებში მონაწილეობა ნაწილობრივ ან სრულად შეეზღუდათ“ - აცხადებს ირინა აბულაძემ.



წელს პირველად, საქართველოს განათლების, მეცნიერების, კულტურის და სპორტის სამინისტროს მხარდაჭერითა და შერიგებისა და სამოქალაქო თანასწორობის საკითხებში საქართველოს სახელმწიფო სამინისტროს ინიციატივით, თსუ-სა და ზუგდიდის შოთა მესხიას სახელობის სახელმწიფო უნივერსიტეტში ხორციელდება სკოლისშემდგომი განათლებისთვის მოსამზადებელი პროგრამა საქართველოს ოკუპირებულ ტერიტორიებზე მცხოვრები აბიტურიენტებისთვის, რომლის ფარგლებში 100-ზე მეტი საქართველოს ოკუპირებულ ტერიტორიებზე მცხოვრები ახალგაზრდისთვის სახელმწიფო უზრუნველყოფს სასწავლო თუ საცხოვრებელი ხარჯების სრულ დაფინანსებას, როგორც მომზადების პერიოდში, ასევე საქართველოს უმაღლეს სასწავლებლებში სწავლის გაგრძელების შემდეგ. აღნიშნული პროგრამა მომავალ სასწავლო წელსაც გაგრძელდება.