სპორტისა და ახალგაზრდულ საქმეთა კომიტეტის წევრი ირინე ფრუიძე ახალგაზრდობის საკითხებზე მოწვეულ საერთაშორისო ექსპერტ მაქსიმილიან ფრასთან, გაეროს სააგენტოების და ახალგაზრდული სააგენტოს წარმომადგენლებთან სამუშაო შეხვედრა გამართა.

„დღეს ჩვენ შევიკრიბეთ იმისათვის რომ განვიხილოთ იმ კვლევის შუალედური შედეგები, რომელიც დაიწყო სპორტისა და ახალგაზრდულ საქმეთა კომიტეტმა გაეროს სააგენტოების მხარდაჭერით, ეს შეეხება ახალგაზრდული პოლიტიკის სამოქმედო გეგმის შედეგების შეფასებას და ამ მიღებულ შედეგებზე დაყრდნობით ჩვენ უკვე ვიმუშავებთ სახელმწიფო ახალგაზრდულ კონცეფციაზე, ძალიან მნიშვნელოვანია, რომ ვნახოთ კონკრეტულად რა გაკეთდა ბოლო რამდენიმე წლის განმავლობაში ქვეყანაში, ახალგაზრდული პოლიტიკის მიმართულებით, რა შედეგები მივიღეთ ამ საქმიანობის საფუძველზე, რა გამოწვევები იყო, რა არის ამის მიზეზები და ამის მიხედვით დავგეგმოთ შემდეგი ნაბიჯები“- განაცხადა საქართველოს პარლამენტის სპორტისა და ახალგაზრდულ საქმეთა კომიტეტის წევრმა ირინე ფრუიძემ.

საქართველოს პარლამენტის ინიციატივით და საქართველოს გაეროს სააგენტოებისა და შვედეთის მთავრობის მხარდაჭერით „საქართველოს სახელმწიფო ახალგაზრდული პოლიტიკის განვითარების სამოქმედო გეგმის“ განხორციელების შეფასებისთვის მიმდინარეობს სამუშაო შეხვედრები, რისთვისაც ტარდება საქართველოში არსებული პრაქტიკების კვლევა, როგორც ცენტრალურ, ასევე ადგილობრივ და რეგიონულ დონეზე.