საქართველოს კომუნიკაციების ეროვნული კომისია სამაუწყებლო კომპანიებს საკუთარ ეთერში უფასო პოლიტიკური რეკლამის გამოყოფის დროს, საქართველოს ცენტრალური საარჩევნო კომისიის მიერ დღეს გამოქვეყნებული ჩამონათვალით ხელმძღვანელობისკენ მოუწოდებს.

როგორც „ნიუსპრესს“ საქართველოს კომუნიკაციების ეროვნული კომისიიდან აცნობეს, მაუწყებლებმა საარჩევნო პროცესში უფასო პოლიტიკური რეკლამის განთავსებისთვის საეთერო დროის გადაანგარიშებისას კომისიის 2012 წლის 15 აგვისტოს #9 დადგენილებით - „საარჩევნო პროცესში მედიის მონაწილეობისა და მისი გამოყენების წესით“ უნდა იხელმძღვანელონ.

კომუნიკაციების ეროვნული კომისია სამაუწყებლო კომპანიებს მოუწოდებს, გაითვალისწინონ ზემოაღნიშნული ინფორმაცია და საკუთარ ეთერში უფასო პოლიტიკური რეკლამა მხოლოდ იმ კვალიფიციური საარჩევნო სუბიექტებისთვის გამოყონ, რომლებიც საქართველოს საარჩევნო კომისიის მიერ დღეს გამოქვეყნდა.

ცენტრალურმა საარჩევნო კომისიამ დღეს 1 ოქტომბრის არჩევნებისთვის კვალიფიციურ საარჩევნო სუბიექტთა ჩამონათვალი გამოაქვეყნა, რომლებიც ბლოკებად დარეგისტრირების შედეგად დარჩა.

ჩამონათვალში „შალვა ნათელაშვილი - საქართველოს ლეიბორისტული პარტია“, „ერთიანი ნაციონალური მოძრაობა - მეტი სარგებელი ხალხს“, „გიორგი თარგამაძე - ქრისტიან-დემოკრატიული გაერთიანება“ და „ბიძინა ივანიშვილი - ქართული ოცნება“ არიან.

საარჩევნო კოდექსის თანახმად, კვალიფიციურმა სუბიექტებმა უფასო საეთერო სარეკლამო დრო უნდა მიიღონ.

კერძოდ, საერთო მაუწყებელი, აგრეთვე მაუწყებელი, რომელიც საკუთარ ეთერში განათავსებს წინასაარჩევნო რეკლამას, ვალდებულია თითოეულ კვალიფიციურ საარჩევნო სუბიექტს უსასყიდლოდ და არადისკრიმინაციულად გამოუყოს ყოველ 3 საათში 90 წამი.