საზაფხულო სკოლის მონაწილეებს დღეს, ბათუმის იუსტიციის სახლში სერტიფიკატები გადაეცათ.
იუსტიციის სამინისტროს ინფორმაციით, ღია კონკურსის წესით შერჩეული ქართველი, აზერბაიჯანელი და სომეხი სტუდენტები საზაფხულო სკოლის ფარგლებში, ერთი კვირის განმავლობაში ელექტრონული მმართველობის პრინციპებს, მენეჯმენტს, სერვისის მარკეტინგს და სხვა საკითხებს ეცნობოდნენ.
„იუსტიციის სამინისტრო ცდილობს, ხშირად იყოს საგანმანათლებლო პროექტების ორგანიზატორი, მჭიდროდ ითანამშრომლოს სტუდენტებთან. ყველა ჩვენს ინიციატივას ახალგაზრდები აქტიურად ეხმაურებიან“ - განაცხადა სასწავლო ცენტრის დირექტორმა ნინო ბერუაშვილმა სერტიფიკატების გადაცემისას.
საზაფხულო სკოლის ფარგლებში, სტუდენტებმა იუსტიციის სახლის მაგალითზე განიხილეს, თუ როგორ მიმდინარეობს ბრენდის ფორმირების პროცესი და მისი მუშაობის სპეციფიკას გაეცნენ.
საზაფხულო სკოლა ბათუმის იუსტიციის სახლში 8 აგვისტოს გაიხსნა.