ქართული მხარე ლონდონის ოლიმპიადაზე თავისუფალი სტილით მოჭიდავე ვლადიმერ ხინჩეგაშვილის ფინალში დამარცხებას არაობიექტურ მსაჯობას უკავშირებს.
55 კგ. წონით კატეგორიაში მოასპარეზე ვლადიმერ ხინჩეგაშვილი რუსეთის სახელით მოასპარეზე ჯამალ ოთარსულთანოვთან ორთაბრძოლაში დამარცხდა და ოლიმპიური ვერცხლი მოიპოვა.
როგორც სპორტისა და ახალგაზრდობის საქმეთა სამინისტრო აცხადებს, რუს ფალავანთან ორთაბრძოლის ბოლო წამებში ქართველი მოჭიდავე აშკარა უპირატესობას ფლობდა, თუმცა, მსაჯებმა ქულა ოთარსულთანოვს მიაკუთვნეს.
„ლონდონის ოლიმპიადაზე ეს მეორე მკაფიო შემთხვევა იყო, როდესაც მსაჯებმა ქართველ მოჭიდავეს ქულა დააკლეს. რამდენიმე დღის წინ ანალოგიურ ვითარებაში, მათ ბერძნულ-რომაული სტილით მოჭიდავე ვლადიმერ გეგეშიძეს ბრინჯაოს მედლისთვის ბრძოლის ფინალში ყაზახ მოჭიდავესთან არ მიაკუთვნეს ქულა ილეთისთვის“-ნათქვამია განცხადებაში.
ხინჩეგაშვილის ვერცხლის მედალი საქართველოს ოლიმპიური ნაკრებისთვის რიგით მეოთხეა. ლონდონში ოქროს მედალი ძიუდოისტმა ლაშა შავდათუაშვილმა, ვერცხლის მედალი ბერძნულ-რომაული სტილით მოჭიდავე რევაზ ლაშხმა, ხოლო ბრინჯაო - ბერძნულ-რომაული სტილით მოჭიდავე მანუჩარ ცხადაიამ მოუტანეს საქართველოს.