გრიშაშვილის ქუჩის N51-ის მიმდებარედ, სკვერის მოწყობის ბოლო ეტაპის სამუშაოები მიმდინარეობს. ადგილობრივი მოსახლეობისა და ტურისტებისთვის განკუთვნილი 1000 კვ.მ-ზე განთავსებული სკვერი თანამედროვე ინვენტარით აღიჭურვება.

პროექტის ფარგლებში, მიმდებარე ტერიტორიაზე ლითონის მოაჯირით ტერასის ხიდი, საყრდენი კედლები, კიბისა და გზისპირა მოაჯირი, სასმელი წყლის შადრევანი და გარე განათების ქსელი უკვე მოეწყო. ასევე, დამონტაჟდა საპარკე სკამები და ტერიტორია დეკორატიული ფილებით მოპირკეთდა.

თბილისის მერიის ინფორმაციით სკვერი, რომლის მოწყობისთვის გამგეობის ბიუჯეტიდან 210 000 ლარია გამოყოფილი, სხვადასხვა სახეობის ხე-მცენარეებით გამწვანდება.

მათი თქმით, რეკრეაციული სივრცის მოწყობის სამუშაოები ასევე, დაიწყო ფონიჭალაში. რუსთავის გზატკეცილის N267-ის მიმდებარედ, სკვერი 3 070 კვ.მ-ზე განთავსდება, რომლის შიდა პერიმეტრი დეკორატიული ფილებით მოპირკეთდება და საბავშვო ზონა მოეწყობა. არსებულ ტერიტორიაზე ასევე, განთავსდება წყლის ადაპტირებული შადრევანი.

ფონიჭალაში მდებარე რეკრეაციულ სივრცეში საპარკე სკამები დაიდგმება და დამონტაჟდება გარე განათების სისტემა. სკვერი თანამედროვე და შეზღუდული შესაძლებლობების მქონე პირთათვის ადაპტირებული ინვენტარით აღიჭურვება. სკვერის მიმდებარედ, ადგილობრივი მცხოვრებლების თხოვნის გათვალისწინებით, მოეწყობა პარკინგი და ჩატარდება გამწვანების სამუშაოები.

ამ დროისთვის, საბავშვო ზონის მოწყობის მეორე ეტაპის სამუშაოები მიმდინარეობს. ბავშვებისთვის განკუთვნილი დასასვენებელი სივრცის შიდა პერიმეტრი დეკორატიული ფილებით მოპირკეთდება და საბავშვო ატრაქციონი დამონტაჟდება.