დღეს ქალაქ ახალციხეში კიდევ ერთხელ პატივი მიაგეს იმ ადამიანთა ხსოვნას, რომლებმაც ზუსტად 30 წლის წინ ქვეყნის თავისუფლებასა და დამოუკიდებლობას საკუთარი სიცოცხლე შესწირეს. სამხარეო ადმინისტრაციის, ადგილობრივი ხელისუფლებისა და საზოგადოების წარმომადგენლები ქალაქის ცენტრალურ პარკში, 9 აპრილის მემორიალთან შეიკრიბნენ და საქართველოს უახლეს ისტორიაში ერთ-ერთი მძიმე და ტრაგიკული დღე გაიხსენეს, ამ დღეს გარდაცვლილების მიმართ კი მადლიერება გამოხატეს.

მემორიალი ყვავილებითა და გვირგვინებით შეამკეს სამცხე-ჯავახეთის სახელმწიფო რწმუნებულმა, ბესიკ ამირანაშვილმა, ახალციხის მუნიციპალიტეტის მერმა, ზაზა მელიქიძემ, საკრებულოს თავმჯდომარემ, გელა ნოზაძემ, ახალციხისა და ადიგენის მაჟორიტარმა დეპუტატმა, გიორგი კოპაძემ და სხვებმა.

დაღუპულთა სულების მოსახსენიებლად პანაშვიდი გადაიხადა ივლიტის ტაძრის წინამძღვარმა, დეკანოზმა მამა იოანემ.

ღონისძიებაზე შესრულდა საგალობლები და წაიკითხეს პატრიოტული ლექსები.

30 წელი გავიდა მას შემდეგ, რაც საქართველოს დამოუკიდებლობის მოთხოვნით დაწყებული საპროტესტო აქცია 9 აპრილს, გამთენიისას მშვიდობიანი დემონსტრანტების დარბევით დასრულდა.

დაიღუპა 21, ასობით ადამიანი კი დაიჭრა, დასახიჩრდა და მოიწამლა.

მომიტინგეთა მთავარი მოთხოვნა საქართველოს საქართველოს საბჭოთა კავშირის შმადგენლობიდან გამოსვლა და დამოუკიდებლობის აღდგენა იყო. დარბევამდე რუსტაველის გამზირზე, პარლამენტის წინ მრავალათასიანი აქცია და შიმშილობა რამდენიმე დღის განმავლობაში გრძელდებოდა. ტრაგედიიდან ზუსტად 2 წლის შემდეგ, 1991 წლის 9 აპრილს მაშინდელმა უზენაესმა საბჭომ ეს თარიღი საქართველოს სახელმწიფოებრივი დამოუკიდებლობის აღდგენის დღედ გამოაცხადა.

დღევანდელი ღონისძიებით ახალციხის მუნიციპალიტეტიც შეუერთდა საყოველთაო მადლიერების კამპანიას, რომლის მიზანი 9 აპრილის მოვლენების დროს, საქართველოს დამოუკიდებლობისა და თავისუფლებისათვის გარდაცვლილთა მიმართ პატივისცემა და მადლიერების გამოხატვაა.