რუსეთ-საქართველოს აგვისტოს ომის 4 წლისთავთან დაკავშირებით დღეს კახეთის ადგილობრივი ხელისუფლება რეგიონიდან ომში დაღუპულთა ოჯახებს ერთჯერად კომპენსაციას გადასცემს.
„ნიუსპრესისთვის“ კახეთის სამხარეო ადმინისტრაციაში ცნობილი გახდა, რომ ადგილობრივი ხელისუფლება, თელავის მუნიციპალიტეტში რუსული აგრესიის დროს გარდაცვლილ ზურაბ ბალაშვილის საფლავს ყვავილებით შეამკობს, მის ოჯახს ეწვევა და 1000 ლარიის ოდენობის კომპენსაციას გადსცემს.
გურჯაანის მუნიციპალიტეტში დაგეგმილია აგვისტოს ომში გარდაცვლილი მეომრების ალექსი ნატროშვილისა და სოსო ღვინიაშვილის საფლავების და მათი ოჯახების მონახულება. გურჯაანში დიდების მემორიალთან მკლავჭიდსა და ჭადრაკში მეომრების სახელობის თასი გათამაშდება.
გვირგვინებით შემკობენ აგვისტოს ომში დაღუპული ექიმის გიორგი აბრამიშვილის საფლავს სიღნაღში და მის ოჯახს 500 ლარის ოდენობის კომპენსაციას გადასცემენ.
ყვარელში, ილია ჭავჭავაძის სახელობის სახელმწიფო მუზეუმში, აგვისტოს ომში ყვარლის მუნიციპალიტეტიდან გარდაცვლილი მეომრების ხსოვნისადმი მიძღვნილი ღონისძიება გაიმართება და თითოეული დაღუპულის ოჯახს 1000 ლარი გადაეცემა.
დღესვე, ლაგოდეხში ღია ცის ქვეშ აგვისტოს ომის ამსახველი დოკუმენტური ფილმის ჩვენება შედგება.
ახმეტის მუნიციპალიტეტში კი, ღია ცის ქვეშ საქართველოს ტერიტორიული მთლიანობისთვის ბრძოლისას დაღუპული გმირების ფოტოების და რუსული აგრესიის შესახებ დოკუმენტური კადრების ჩვენება და ახალგაზრდა მხატვრების ომის თემატიკაზე შექმნილი ნახატების გამოფენა მოეწყობა.
დედოფისწყაროს მუნიციპალიტეტში სოფელ ფიროსმანსა და ზემო ქედში ადგილობრივი მუნიციპალიტეტის წარმომადგენლები გვირგვინებით შეამკობენ ომში გარდაცვლილთა საფლავებს, დედოფლისწყაროს თავდადებულთა მოედანზე კი, ომში დაღუპულთა მემორიალი გაიხსნება. ომში გარდაცვლილთა ოჯახები კი, ათას-ათასი ლარის ოდენობის დახმარებას მიიღებენ.
საგარეჯოს მუნიციპალიტეტში ომში გარდაცვლილების სოფელ დიდ ჩაილურში მცხოვრები გიორგი კირაკოზაშვილის და სოფელ მარიამჯვარში მცხოვრები რევაზ მამისაშვილის საფლავებს გვირგვინებით შეამკობენ.