სამაშველო სამსახურის თანამშრომლები მესტიაში 4 რუსი ტურისტის გადარჩენას ცდილობენ.
რუსი მთამსვლელები მე-5 დღეა მწვერვალ თეთნულდზე, დაახლოებით  3 700 მეტრის სიმაღლეზე იმყოფებიან.
ალპინისტები მწვერვალზე ასვლისას მოულოდნელად ფერდიდან მოწყდნენ და მიუვალ ადგილას ჩავარდნენ.
მოყვარულმა მთამსვლელებმა კავშირის გაწყვეტამდე მეგობართან დაკავშირება შეძლეს, რომელმაც მომხდარის შესახებ სამაშველო სამსახურს შეატყობინა.
ჯერჯერობით უცნობია, თუ რა გახდა მომხდარის მიზეზი. სავარაუდოდ, ისინი კლდის ნაშალის ცვენაში მოყვნენ.
ალპინისტების პოვნას სამაშველო ჯგუფი ცდილობს, თუმცა, უამინდობის გამო, მათთან მიახლოებას ვერ ახერხებს.
ამავე მიზეზის გამო, სამაშველო სამუშაოებში ვერც ვერტმფრენის ჩართვა ხერხდება.