მარნეულში ევროკავშირის მიერ მომზადებული და მხარდაჭერილი პროექტი იწყება, რომელიც მწვანე ნარჩენების შეგროვებასა და გადამუშავებას დაარეგულირებს.
პროექტში ჩართულია გარემოს დაცვისა და სოფლის მეურნეობის სამინისტრო, მარნეულის ადგილობრივი ხელისუფლება და კომპოსტირების საწარმო.
გარემოს დაცვისა და სოფლის მეურნეობის სამინისტროს ინფორმაციით, პროექტი მიზნად ისახავს ქვეყანაში მუნიციპალური ნარჩენების სეპარირებული შეგროვებისა და რეციკლირების ხელშეწყობას, ასევე, იმ მწვანე ნარჩენების ეფექტიან გამოყენებას, რომლებიც რეგიონულ ნაგავსაყრელებზე ხვდება და მათი მოცულობის დაახლოებით 50%-ს იკავებს.
პილოტური პროექტის პრეზენტაციას ესწრებოდნენ ევროკავშირის ელჩი საქართველოში, კარლ ჰარცელი, გარემოს დაცვისა და სოფლის მეურნეობის მინისტრის მოადგილე, ხატია წილოსანი, ქვემო ქართლის გუბერნატორის მოადგილე ზაურ დარგალი, მარნეულის მერი ზაურ ტაბატაძე და ადგილობრივი ხელისუფლების წარმომადგენლები.
"ჩვენ ძალიან მნიშვნელოვნად მიგვაჩნია მსგავსი ტიპის ინიციატივების მხარდაჭერა, ვინაიდან ეს არის კარგი შესაძლებლობა, მარნეულის მუნიციპალიტეტში საწარმოს მიერ მიღწეული შედეგები სხვადასხვა რეგიონში დაინერგოს. ასევე, მნიშვნელოვანი საკითხია ნარჩენების სწორი მართვა, დამუშავება და მისი ხელახალი დაბრუნება ბუნებაში", - განაცხადა ხატია წილოსანმა.
"ევროკავშირი მსოფლიო ლიდერია გარემოსდაცვითი და ჯანდაცვის საკითხებში, რომლის მნიშვნელოვან შემადგენელს ნარჩენების მართვა წარმოადგენს. მოხარულები ვართ, რომ შეგვიძლია საკუთარი გამოცდილება საქართველოს გავუზიაროთ. ევროკავშირის მიერ მხარდაჭერილი ამ პილოტური პროექტის საშუალებით ჩვენ ვამტკიცებთ, რომ საქართველოში არსებობს ნარჩენების უკეთესად მართვის და მწვანე ნარჩენების სასარგებლო კომპოსტად გადაქცევის შესაძლებლობები", - აღნიშნა კარლ ჰარცელმა.
პილოტური პროექტის პრეზენტაციის ფარგლებში დიდი ზომის კონტეინერები დაიდგა საცხოვრებელ უბნებსა და რამდენიმე საბავშვო ბაღში, ხოლო მცირე ზომის სამზარეულოს კონტეინერები დარიგდა სამიზნე ოჯახებსა და შერჩეულ საბავშვო ბაღებში.
გარდა ამისა, გაიმართა საინფორმაციო შეხვედრა მოსარგებლე მხარეებთან, რომლის დროსაც ევროკავშირის ტექნიკური დახმარების პროექტის ექსპერტებმა მწვანე ნარჩენების შეგროვების მიზანი და მეთოდი განმარტეს.
