კომპანია „ჯორჯიან უოთერ ენდ ფაურის“ წარმომადგენლები „ლეიბორისტული პარტიის“ ბრალდებას უსაფუძვლოს უწოდებენ.

როგორც კომპანიის მიერ გავრცელებულ განცხადებაშია ნათქვამი, სარეაბილიტაციო სამუშაოები, რომელიც თბილისის ქუჩების წყალსადენისა და წყალარინების მიწისქვეშა ქსელების სრულ განახლებას ითვალისწინებს, გარკვეული უბნებისთვის წყალმომარაგების შეწყვეტას მოითხოვს.

განცხადების თანახმად, აღნიშნული სარეაბილიტაციო სამუშაოების ჩატარება სხვაგვარად შეუძლებელია.

„ბოლო პერიოდში, მესამე მხარის ბრალეულობის გამო, რომელიც ასევე, სამშენებლო სამუშაოებს აწარმოებს, „ჯორჯიან უოთერ ენდ ფაუერის“ კუთვნილი მაგისტრალური ქსელების რამდენიმე სერიოზული ავარიული დაზიანება მოხდა, რამაც თავის მხრივ, მოსახლეობას წყალმომარაგება შეუწყვიტა“ - ნათქვამია განცხადებაში.

კომპანიის წარმომადგენლების ინფორმაციით, ტექნიკური ბრიგადების მუშაობის შედეგად ყველა სახის დაზიანება უკვე ლიკვიდირებულია და მოსახლეობას წყალი უწყვეტ რეჟიმში მიეწოდება.

რაც შეეხება წყლის ხარისხს, „ჯორჯიან უოთერ ენდ ფაუერის“ ინფორმაციით, თბილისის მოსახლეობისთვის მიწოდებული სასმელი წყალი, როგორც ეროვნულ სტანდარტებს ასევე, ჯანდაცვის საერთაშორისო ორგანიზაციის რეკომენდაციებს შეესაბამება.

მათი განცხადებით, კომპანიის ცენტრალური ლაბორატორია ყოველ საათში ერთხელ წყლის ხარისხს აკონტროლებს და სრული პასუხისმგებლობით აცხადებს, რომ თბილისის მოსახლეობისთვის მიწოდებული სასმელი წყალი მაღალი ხარისხისაა და ჯანმრთელობისთვის უსაფრთხოა.

„ლეიბორისტული პარტიის“ ერთ-ერთმა ლიდერმა პაატა ჯიბლაძემ დღეს ხელისუფლებას თბილისის მოსახლეობის ივლისი-აგვისტოს თვეების წყლის გადასახადისგან გათავისუფლება მოსთხოვა.

ძაგანიას თქმით, თბილისის მოსახლეობას ზაფხულის სიცხეში თბილი წყალი მიეწოდება, რაც დაუშვებელია.