კოალიცია „მედიის ადვოკატირებისთვის“ კომუნიკაციების ეროვნულ კომისიას Must Carry-ის შესახებ მიღებული კანონის არასწორ ინტერპრეტირებასა და კანონის  დარღვევაში ადანაშაულებს.

ამის შესახებ კოალიციის წარმომადგენლებმა დღეს გამართულ პრესკონფერენციაზე განაცხადეს. კოალიციის ერთ-ერთი წევრის ლევან დოლიძის განმარტებით, კომისიამ დაარღვია კანონით ნაკისრი ვალდებულება და სრულად დადგენილ ვადებში არ გამოაქვეყნა ინფორმაცია იმ მაუწყებლებისა და მაუწყებლობის ტრანზიტზე ავტორიზებული პირების შესახებ, რომელთა მიმართაც Must Carry-ის პრინციპი ვრცელდება.

მისივე თქმით, კომისიის წევრები კანონის არასწორ ინტერპრეტაციას ახდენენ, როდესაც აცხადებენ, რომ მაუწყებლობის ტრანზიტზე ავტორიზებულ პირებს შესაბამისი სამაუწყებლო არხების მომსახურების პაკეტში ჩასმის ვალდებულება წარმოეშვებათ მხოლოდ მას შემდეგ, რაც ტელეკომპანიის წერილობით შეტყობინებას მიიღებენ და თავად ტელეკომპანიები უზრუნველყოფენ სიგნალის მიწოდებას.

„კანონის ამგვარი განმარტება არ შეესაბამება Must Carry-ის შესახებ მიღებული საკანონმდებლო აქტის მოთხოვნებს, ვინაიდან, საარჩევნო კოდექსის 51-ე მუხლი საერთოდ არ ითვალისწინებს ტელეკომპანიების მიერ წერილობითი შეტყობინების ან სიგნალის მიწოდების ვალდებულებას“ - განაცხადა დოლიძემ.

კოალიცია „მედიის ადვოკატირებისთვის“ მოუწოდებს კომუნიკაციების ეროვნულ კომისიას თავი შეიკავოს კანონის არასწორი ინტერპრეტაციისგან და გადადგას ქმედითი ნაბიჯები, რაც ხელს შეუწყობს ზემოაღნიშნული კანონის ეფექტიანად აღსრულებას.