სრულიად საქართველოს კათოლიკოს-პატრიარქმა უწმინდესმა და უნეტარესმა ილია მეორემ სამების საკათედრო ტაძარში, საზეიმო ლიტურგიის შემდეგ, განწყობის თეორიასა და სიკეთის მნიშვნელობაზე იქადაგა.
როგორც პატრიარქმა აღნიშნა, დღეს უდიდესი დღესასწაულია. პატრიარქის თქმით საოცარი სიტყვაა ილია, რადგან ერთ სახელში, ერთ სიტყვაში ღმერთია. მისივე თქმით, უფლის ძალას ყველგან გრძნობდა და ის მთელ საქართველოს ყოველთვის მფარველობდა.
როგორც პატრიარქმა ბრძანა, ქართველი ადამიანი საოცრად უბრალოა და ამავე დროს დიდია, ის მოაზროვნეა, მაგრამ ნაკლებად ვაზროვნებთ.
„აზროვნების შესახებ ჩვენს წინაშე საოცარი მიღწევა დიმიტრი უზნაძის „განწყობის თეორიაა“. მასში ასახულია, თუ როგორ უნდა განვეწყოთ ისე რომ სიკეთე ვაკეთოთ, თუ როგორ უნდა განვეწყოთ იმისთვის, რომ ბევრი შვილი გვყავდეს და როგორ მივაღწიოთ იმ განწყობას, რომ მეცნიერება ჩვენი თანამგზავრი და იმედი იყოს“ - ბრძანა პატრიარქმა.
მისივე თქმით, გენიალურმა მეცნიერმა, ფილოსოფოსმა და ფსიქოლოგმა დიმიტრი უზნაძემ განწყობის თეორია აღმოაჩინა, მაგრამ ქართველი ადამიანი მას ვერ იყენებს.
„ჩვენ თვითდინებას ვართ მიცემული. არ შეიძლება ადამიანი ასეთ მდგომარეობაში იყოს. მან ბევრი უნდა იფიქროს, ახალი იდეები შვას და ამით ღმერთის უსასრულობას დაუახლოვდეს“ - აღნიშნა პატრიარქმა და დასძინა, რომ ის მოსახლეობისთვის აზროვნებაში და სრულყოფის პროცესში დახმარების იდეით გამოდის.
მისივე თქმით „განწყობის თეორიას“ ძეგლი უნდა დაედგას.
„მე უკვე წარმოდგენილიც მაქვს პირამიდა, რომელიც ოქროს ისრით მთავრდება. აღნიშნული ძეგლი გვაფიქრებინებს იმაზე, თუ რა უნდა გავაკეთოთ და როგორ უნდა ვიცხოვროთ ისე, რომ სიკეთე ვაკეთოთ, რადგან, როცა ადამიანი ცუდ საქმეს აკეთებს, ცუდი მასვე უბრუნდება“-ბრძანა პატრიარქმა და დასძინა, რომ საქართველოს უფალი ბევრ კეთილისმყოფელ ადამიანს უგზავნის.
სრულიად საქართველოს კათოლიკოს-პატრიარქმა სამების ტაძარში მყოფ რეგიონული განვითარებისა და ინფრასტრუქტურის მინისტრს რამაზ ნიკოლაიშვილს ქართველი ერისთვის გაკეთებული დიდი საქმეებისთვის მადლობა გადაუხადა.
„მადლობა იმისთვის, რასაც ქართველი ერისთვის აკეთებთ, რამდენი ადამიანი აგიშენებიათ, რამდენისთვის ხელი გაგიწვდიათ. მინდა გითხრათ, რომ ხელი, რომელსაც სხვას უწვდით, ცარიელი არასდროს დარჩება“ - ბრძანა პატრიარქმა და ქადაგების დასასრულს მრევლს დღევანდელი დღე მიულოცა.
მართლმადიდებელი სამყარო დღეს წინასწარმეტყველ ელია თეზბიტელისა და წმინდა ილია მართლის ხსენების დღეს აღნიშნავს. 2 აგვისტო ასევე პატრიარქის ანგელოზის ხსენების დღეცაა. აღნიშნულ დღესასწაულთან დაკავშირებით, 20:00 საათზე საპატრიარქოს ეზოში ღონისძიება გაიმართება.