თბილისის მუნიციპალიტეტის ათივე რაიონის გამგეობა ბინათმესაკუთრეთა ამხანაგობების აღრიცხვისა და დაფინანსების ახალი წესის პრეზენტაციას მართავს. დაფინანსების ახალი წესი ადგილობრივ მოსახლეობას დიდუბის რაიონის გამგეობამ გააცნო, რომელსაც აღნიშნული რაიონის ამხანაგობების თავმჯდომარეები ესწრებოდნენ. დაფინანსების ახალი წესის მიხედვით, ბინათმესაკუთრეთა ამხანაგობას საკუთარი ინფრასტრუქტურული საჭიროებები 100%-ით დაუფინანსდება, ხოლო მოსახლეობას ეკისრება ვალდებულება, დაფინანსებული სამუშაოების ღირებულების არანაკლებ 10%-ის ოდენობის თანხა შეაგროვოს, რომელსაც საერთო ინფრასტრუქტურულ განვითარებას მოახმარს. ახალი წესის მიხედვით, გამგეობა დაფინანსებას ტენდერის მეშვეობით ახორციელებს, ხოლო სამუშაოებს ტენდერში გამარჯვებული კომპანია აწარმოებს. სამუშაოთა მიმდინარეობაზე ზედამხედველობას განახორციელებს და შესრულებული სამუშაოების ხარჯთაღრიცხვას ადასტურებს ა(ა)იპ „თბილისის მუნიციპალური ლაბორატორია“. იმისთვის, რომ ამხანაგობამ დაფინანსება მიიღოს, საჭიროა, გამგეობაში აღრიცხვაზე იმყოფებოდეს, ჩაატაროს კრება და პრიორიტეტული სამუშაოების რიგითობა განსაზღვროს. საერთო კრების ოქმის საშუალებით, ამხანაგობა საერთო ქონების ექსპლუატაციისთვის აუცილებელ ხარჯებს განსაზღვრავს და ამხანაგობის ანგარიშზე განათავსებს. ამხანაგობა ასევე, შეიმუშავებს ერთწლიან სამოქმედო გეგმას, გამგეობას განცხადებით მიმართავს და საჭირო დოკუმენტაციას წარუდგენს. პრეზენტაციის დასრულების შემდეგ, დიდუბის რაიონის გამგებელმა ირმა ზავრადაშვილმა ბინათმესაკუთრეთა ამხანაგობის თავმჯდომარეების შეკითხვებს უპასუხა და მათ საინფორმაციო ბუკლეტები დაურიგა. დიდუბის რაიონის გამგეობაში სულ 677 ამხანაგობაა რეგისტრირებული. ბინათმესაკუთრეთა ამხანაგობების განვითარების ხელშეწყობის პროგრამის ფარგლებში, დიდუბის რაიონის გამგეობის ადმინისტრაციულ შენობაში შეხვედრები ორი კვირის განმავლობაში გაგრძელდება.